Ki 9 tylli ki ri ka Europe da sdang ki wow tipmit ya i tika wa pynmih ha India iwa tip kam i Covishield wow man i kam chibynta lang wa kiwi ki tika wa da tipmit hapoh Europe yow yoh ya ka “Green Pass” yow laitlooid i lai i wan ki bru kiwa da dep yoh yei tika.
Kini ki 9 tylli ki ri kynthup ki ya ka Austria, Germany, Slovenia, Greece, Iceland, Ireland, Spain, Estonia wa ka Switzerland kiwa da mynjur ki ya i tika wa pynmih da ka Serum Institute of India i Covishield kam chibynta ka “Green Pass” Scheme ka European Union (EU) yow suk i lai i wan hapoh ka EU.
Kam wow pynkynmoo wa ha kani ka tayaw ka EU ym em booh ko ya i Covishield kam iwi na i tika wa da tipmit hapoh ka Green Pass neidaw wa ka SII ym em paan ko yei tipmit ya i tika na ka European Medicines Agency iwa da leh ki kattæ yow yoh yei tipmit ha waroh kawi ka Europe. Heiwa i tipmit da ki ri katni toh i rai da ki jar jiar ki ri.
Neiliang ka India da maham ko wa lada ym tipmit ka EU ya ini ini i tika, ka India leh ym tipmit ko ya kiwa na Europe kiwa wan cha India.
Ki tika wa da em chwa hapoh ka “Green Pass” ka Europe toh i yong ka Pfizer/BioNTech (Comirnaty), Moderna (Spikevax), Oxford-AstraZeneca (Vaxzevria) wa i yong ka Johnson & Johnson (Janssen). I Covishield wa pynmih ha India toh i jooh (Formula) wa chna da ka AstraZeneca iwa pynemkaam ha Europe deiwa e pyrtuid kam i Vaxzeriva tangwa ha India da e pyrtuid Covishield iwa pynmih hapoh ka ri da ka SII.
