Ka sorkar India da pynhiar ko da ki chipai cha khappood hadien wa i kynaad da joor bha i ha ka ri Bangladesh iwa da pynman ya ka Prime Minister katai ka ri, ka Sheikh Hasina wow hiar chuki wei wow ieh noh yei kaam heiwa da yut ko cha Tripura ynne ka sngi.
Yow tem ya iwon iwon i jia iwa ye wow pynpoor yei diñ cha ka India, neiliang ka sorkar pyrdi da phah ko da ki chipai wei ynne ka sngi da ki phaw tylli ki kari chipai da wan chna ktem ki ha Nongtalang, West Jaintia Hills kawa me hajan wa u pood waka Bangladesh.
Ini i wan poi ki chipai India ha ka thaaiñ khapppood toh yow yada ya ki bru ka ri na iwon iwon i chah hiar thma na chiliang pood.
Ha iwi won i liang da em ki khubor wa da mih wa ynne i miet da em da ki spah ngut ki bru na Bangladesh kiwa wan da ki lieñ ryngkat ki Torch Light yow khloh moo ha wah Umngot hajan Dawki. Wei yeini da yoo da ki paidbah wa che khri-khrak ki Torch Light iwa da pynkhyrngiat ya kiwa sah ha India na ka thaaiñ Dawki, Umsyiem wa kiwi ki chnong.
Katkam ka khubor wa da yoh lum wa i daw wan ki bru na Bangladesh yow khloh moo toh yeini da khang pyrchah ha ki por wa synchaar ka Sheikh Hasina tangwa ynne i miet hadien wa da hiar chuki noh ko, da wan kini ki bru kam ki kber da ki lien yow khloh moo.
Kam wow pynkynmoo wa ka sorkar Meghalaya da pynkrhkaam ko da ka Curfew heipor miet ha ki thaw khappood, heiwa u Symbood Montri Rangbah ka jylla u Prestone Tynsong da pyntip u wa da em ka 9 Battalion ki BSF kiwa da wan kyrpang wow pait yei khappood ka Meghalaya hadien wa da mih i jia ha Bangladesh.
Discussion about this post