Jowai : Ka chnong Changpung hadien wa da chah jied ko kam kawi na ka Model Village hapoh ka ri India da u MP u ma V. Pala ha u Naitunh (April) yong u snem 2015 hapoh ka skhim pynroi ka Sansa Adarsh Gram Yojana ynne ka sngi da yoh u sakhi leh ya i kreh pynthymme ya ka Iaw Ñiam kawa tip kam ka Iaw Muchai yong kani ka chnong.
Nadooh wa chah jied ki artylli ki dong ka Changpung hapoh ka (SAGY) wa kynthup ya ka Changpung Pohchnong wa ka Changpung Mission da pynkup leh ya kiwa boon ki naam ha kini ki ar tylli ki dong wa kynthup ya ka naam Open Defecation Free, Blindness Free wa ka Child Labour Free Village.
Ynne ka sngi da pynman leh ya ka yalang paidbah ha Seiñ Tyllilang Auditorium, Shangpung Pohshnong yow pynche paidbah ya ka skhim National Rural Livelihood Mission ka skhim wa thmu u pynku ya i khih i khan kiwa dooh wa duk deiwa pyllang ki hapoh ki Self Help Group (SHG) yow ye ki u pyllang poisa kamjooh u ya e ram chim ram.
Hei yatoh wa kani ka skhim da wan pynche ya ki paidbah da ka kong C. Kharkongor ka CEO yong ka Meghalaya State Rural Livelihood Story.
Hadien ini da lai li peit li sylli ya ka Iaw Muchai kawa da pynchna dei thmu u pynman ya ka kaam ka Model Market hei yakreh lang ki tnat sorkar wapher wapher kam ka PWD, PHE, MeECL wa ka Ophis u BDO Laskein C&RD Block. Napoh ka skhim NREGA da pynkhreh poisa hadooh 44 Lak yow kreh ya kani ka Iaw wei wa da antaad hadooh wow pynep ya kani waroh ye u poi i lut hadooh T. 1 Klur.
Ya i kreh ya kani ka Iaw da sdang nadooh u Wisu (March) wei wa lada lai beit i kaam ye u pyndep hapoh 6 bnai.
Ya kani ka Iaw da kyrriah ya ka cha ka madan wa hajan kani ka Iaw wa tip kam ka Poh Lyngdoh.
Heni hawah toh ki dur yong kani ka Iaw ha chwa u tympra ya ka. Kamjooh ya ki drawing yong i dur manda dep chana thyme ya ka.
Discussion about this post