Hadien wa pdung Bomb iwa da jia ynnin ka sngi, ynne i step ka sngi nyngkong, ka thaaiñ Khyndailad khamtam i thaw wa em i pdung Bomb da lyngngam i kiaw, tangwa da em du ki pulit kiwa dang pait ya katai ka thaw wa ki bru kiwa dang pynkhooid leh yei chah ktah. Wei hadien wa da dep pynkhooid, ki pulit da e laad biang ki ya ki paidbah wow lai na katai ka thaw wei wow chong dukan nadooh i por 2 duna i sngi.
Hawa lai pait da chem wa ki paidbah kiwa dai dukan ha katai ka thaaiñ da yang ki wow wai noh ya ki dukan, tangwa neiliang ki bor pulit ym chah ki wow psiah chapoh ka thaw wa jia i pdung Bomb ha khyrdop yong ka dukan dai Mobile, kawa man ka Building yong ka Centre Point. Da chem leh wa ki pulit da khang luti ki ya ki paidbah wow lai luti na Centre Point ter ter hadooh ka thaw wa em ka R.B. Store khnang wa ki wakreh ka Municipal wa ki tre dukan u yoh ki wow pynkhooid wei wow lum yow lang ya ki tiar ki tar kiwa da pra wei wow pynkhooid ya ki yit kiwa da piah yow lait na i iwon iwon i mynsoo ya kiwa lai wa yieñ ha kani ka thaw.
Hawa yoh u yaklam wa ki kattu katni ngut kiwa chong dukan, da pyntip wa i pdung uni u Bomb da pynkhyrngiat ya waroh wei da ktah chiboon ya ki hadien wa da hap wow wai noh ya ki dukan yong ki du chiteiñ sngi. Da pynsñiaw ki wa man ki kiwa smat wow ya krehlang wa ki pulit ha kam ini i jia wow e laad ya ki bor yong ka aiñ wow leh ya iwa emkaam.
Chooh chooh da pynsñiaw wa embhah wa ha ini i jia ha ka janmiet yong ka sngi Bibar toh wa waroh ki dukan da khang lut wei kiwa lai luti da duna ki wei ym em da wanrah ya iwon iwon i mynsoo ya ki paidbah.
