Ka Mecca da sdang biang ko wow khai im hadien 7 bnai wa da khang ya ki para wa ngait niam wei suki suki da chah ya ki wow wan ki nadooh ka 3 tarik uni u bnai hadien wa ka Saudi Arabia da sdang ko wow rah noh yaki kyndon yada naka khlam COVID-19 yow ye ki bru wow leh yaka leh niam Umrah kawa man kawi naka lai Pilgrim cha ki ar tylli ki thaw wa kyntang ka Islam kawa ye u leh ha iwon iwon i por yong u snem.
Ha ki por wa nachwa da ki Million ngut ki Muslim na kylleiñ ka pyrthai jooh hiar ki cha Saudi Arabia yow leh yaka Umrah waka Haj. Kini ki ar jait ya sariem bha ki ha i rukom leh niam tangwa ka Haj toh kawa da leh chisien chi snem wei man ko leh kawa jrong wei kawa hap leh ki Muslim chisien hawa im ki.
Ka Saudi Arabia ha ini u snem da leh ko kawi ka Haj tangwa kawa chah du para niam kiwa em hapoh ri donhi, wei ha kani ka 3 tarik da chah ki wow leh yaka Umrah deiwa chah du 30% ki bru iwa man 6,000 ngut chi sngi wei daw chah ya ki Muslim na kiwi ki ri nadooh ka 1 u Khonchonglad (Nov).
Ha u 2019 da em 19 Million ngut kiwa wan wow leh yaka Umrah.
Ha chwa ka khlam, 1,300 tylli ki Hotel wa ki spah tylli ki dukan ha ki artylli ki chnong wa kyntang ki Muslim kitæ ka Mecca wa Medina toh kiwa jooh man kiwa dap bru wei kiwa yoh khih bha tangwa katni waroh da man ki kiwa dooh nong kiwa khang.
