Jowai: Ynne ka sngi u Dr. Sudhir Kumar, Scientist naka National Institute of Hydrology Roorkee, Uttarakhand da mih u wow wan cha ka thaw wa chah kset ki 15 ngut hapoh ka krem mooyong wa em ha Ksan ka wow dap chi bnai haka 13 tarik.
Da wan leh ki bru naka Company Planys Technologies wa em ha Chennai kiwa da kit da ka leiñsuiñ ka Indian Air Force (AN 32) kiwa da wanrah ya ka kor ROV kawa khian wa stiñ bar ya ka yong ka Indian Navy kawa ye leh u ngam yillu wei rap slem.
Ha Ksan won ka Coal India Limited da pteiñ ko wow taan um na kawi ka krem mooyong warim wa em hajan kiwa chah kset, wei da taan um da 21 kynta nadooh 6:00 waje ynnin i janmiet hadooh ynne i janmiet wei waroh ka um wa da sai da poi ko kamwa 2381400 liter wei da taan leh ya ka um na sa kawi ka krem mooyong warim kawa em hajan.
Neiliang ka Odisha Fire Service da taan um ki nadooh 11:30 i step hadooh 5:00 waje i janmiet ynne ka sngi wei da sai um ki kamwa 405000 liter.
Ka Kirloskar Company won da pynemkaam ko ar tylli ki Pump yow taan um naka krem mooyong wa em kiwa chah kset nadooh 6 waje i janmiet ynnin ka sngi hadooh 5 waje i janmiet ynne ka sngi wei da sangeh yow thap phniang ya ki Generator wei da sai um hadooh 3240000 liter.
Ynnne ka sngi da wan leh sa kawi ka Company kawa tip kam ka KSB kawa na Germany kawa em ophis leh ha Pune kiwa da wanrah ya ki Pump wa khlan bor 82HP kawa ye u taan um 198000 liter chi kynta.
Neiliang ka chnat PHE ka sorkar jylla da yarap ki wow pynkhooid ya ka um wa sai deiwa pynemkaam da u Bleaching Powder.
Discussion about this post