Kam chibynta wow jubab yei kyrpaad u Lat ka Manipur, u Ajay Kumar Bhalla ya ki paidbah ka jylla wow pynuiñ ya ki tiar yasiat wa da tooh ki na ka sorkar hapoh 7 sngi, neiliang ki seiñ ki Meitei hapoh kawi ka satri, ynnin ka sngi da kyntu ki ya u Lat wow yaklam wa kiwa yahkhmat ki khynroo yow pyntikna wa bien ki wow pynuiñ ya ki tiar yasiat wa em ha ki.
Ka Coordinating Committee on Manipur Integrity (COCOMI) hawa pynlait khubor da ong ko wa 7 sngi toh iwa duna bha yow pyndep yei yaklam.
U Lat ha ka 20 tarik uni u bnai da kyntu u ya waroh wow wan pynyuiñ ya ki tiar yasiat hapoh 7 sngi wei ym pynchitom ya ki tangwa hadien wa kut ki 7 sngi ki wym bien u pynuiñ daw chah pynchitom ki.
Ka COCOMI da ong ko wa ini i kyntu u Lat toh kawi ka laad wow wanrah yei suk tangwa da emkaam leh wow sñiawthooh yei daw wa da em ki khynroo wa chim ya kini ki tiar yasiat wei da leh ki yeini hadien wa ki bor sorkar wa toh wow yada ym leh ki yei kaam yong ki wow yada ya kiwa lui-lui heipor wa joor bha ka yaleh.
Kamtæ da ong wa du 7 sngi da duna ware wow leh yeini wei da toh u e por yow ye u wanrah yei ya sñiawthoohlang yow lait biang u mih i yaleh pyrchah.
Da booh leh yei kyrpaad na u Lat wym toh u pynchitom ya kitu ki wym em laad de deiwi lait noh wow yada ya jar jiar ka jaitbru waka yung ka sem ki.
Da e buit ki leh wa kini ki tiar yasiat ym du kiwa yong ka sorkar wa hap wow pynyuiñ tangwa kitu kiwa na baar ri wei wow leh yeini deiwa khooid.
Da dawa leh wa ki seiñ kieñ suloi ki Kuki wa em hapoh ka Suspension of Operation wa da yasoi soskular waka sorkar pyrdi toh u kyrriah ki cha kiwi ki thaw.
Ha iwi won i liang, ki pulit ka Manipur da pyntip ki wa hadien wa da pynmih u Lat yei kyntu da sdang ki bru wow wan pynuiñ boon tylli ki jait suloi wa kiwi de ki nadooh ka Tear Gas Gun wa chah tooh.
Puræ leh: E laad u Lat ka Manipur wow pynuiñ ya ki tiar yasiat dei wym chah pynchitom
Discussion about this post