Jowai: Ki kattu katni ngut ki waheh wa kynthup ya kiwa chong wa sah haki thaaiñ khappood Meghalaya-Assam dei lang waki kattu katni ki seiñbhalang ka ri-loom Jaiñtia da sdang ki u yachem wow phyllu yumut wow thooh laad thooh luti yow yaleh pyrchah yei tia pood ka sorkar Assam kawa da jia neipor cheipor.
Ya ka yalang yachem yumut da pynlum pynlang da u Chandame Sungoh, u Damechwa Syrti waka Deiwi Tonggper ha Infinity Conference Hall Jowai, hei emlang u waheh chnong ka Khanduli u Mulin Rumut, u chongknor ka chnong Khanduli u Elias Siangshai, u waheh Chnong Umchangiar, u Tynshain Krem Secretary chnong Umchangiar, neitæ u Andreas Suchiang na Saba waki kattu katni ngut ki bru waheh wasian deilang wa kiwa yahkhmat seiñbhalang waphær waphær ka ri-loom Jaiñtia.
Hadien i ya e yumut kylliang da rai ki wow em ka Joint Action Committee kawa kyrpang du neibynta u pood u ang hapyrdi ka jylla Meghalaya waka Assam. Neitæ won da rai haroh ki wow pynman biang ka yachem yumut sa iwi won i por yow chna yaka Committee kamjooh yow jied ya kiwa kitkaam yong ka wei yow kreh wot ko yei kaam.
Discussion about this post