Ka Jaiñtia National Council (JNC), Central Executive Body ynne ka sngi da sdang ko wow mih lai yalap paidbah hajrong ka Save Jaiñtia Mission kawa da yoo jngai da ka hi, wei yeini i lai yalap da sdang ki ha Iawmusiang, Jowai deiwa wan kyrchanlang kiwi won ki seiñbhalang wa kynthup ya ka JSU, JSM wa kiwi.
Lyngba kani ka Save Jaiñtia Mission ka seiñ da dawa ko wow pynkhlan bor ya ka JHADC kamwa jooh pynkupbor daka aiñ yong ka 6th Schedule khnang wa ki riti dustur leh u neh u sah ki.
Kiwi de ki thong toh wow pynpsiah yei ktien Pnar ha ka State Anthem wa ha ka State Language Act.
Neitæ u chna yaka Policy thung kreh haki karkhana pynmih khyndaw-bilat khnang yow myntoi ki khon khynroo khyllood tre ri tre muluk.
Wow pynbait ya u pood u ang hapyrdi ka Jaiñtia Hills wa Assam deiwa pynchong yurim yaka Map yong ka Jaiñtia Hills wa da em chwa u 1951.
Wei kamjooh leh wow chna noh daka Small Scale Coal Mining Policy khnang yow yoh byntalang ki khian ki nai hei kaam khih mooyong, ym kamwa man katni hei pyrchang wai mooyong ka sorkar ye u kreh du kiwa em donhi ya ki thaw waheh waheh.
Kiwa e i klam ha kani ka sngi kynthup ki ya u Hame Bamon, President JNC Western Zone, u Nangjan Dkhar, Vice President JNC-CEC, u Neil Mukhim, Acting GS JSU, u Heihok Supuh, President JSM Western Region, u Mehi Rymbai, Arts and Culture Secretary JNC CEC, u Wanshwa Suting, General Secretary JNC-CEC wa u Sambormi Lyngdoh, President JNC CEC kiwa da ong wa heiyatoh i yoh laad wan tia ki baar jylla cha Ri-loom Jaiñtia neibynta u kamai wei seiñ ki kharkhana waheh waheh, i daw toh wa tlot krehkaam ka District Council.
Yeini i lai yalap daw pteiñ haroh ki ha ki thaw waphær waphær ka Riloom Jaiñtia.
Discussion about this post