Ka Jaiñtia Students Union-War Jaiñtia Circle ynnin ka sngi hapoh i yahkhmat u President ka War Jaintia Circle u Eddy Kery Pohtam, u General Secretary u Kerrydiam Lamin wa u Assistant General Secretary u Dewan Bareh; kam i dak wow pynsñiaw yei pyrchah yei wym mano ka sorkar ya i dawa ka seiñ, neiliang ka seiñ da seh ko da ka lama yong hakhmat ka Nongtalang CHC khnang wow pynbor ya ka sorkar wow sdang biang ya ka 108 Emergency Ambulance Service ha Amlarem Sub-Division kawa jooh em wow chakri ya ki paidbah wei wow yarap pynpoi ya kiwa kjut cha ki Hospital deilang wa i em ki Paramedics wa kiwi ki laad sumaar.
Ka seiñ hadien wa da kut i por chitayaw wa e por ya ka sorkar wow wanrah biang ya ka 108 nadooh wa da pyndooh ya ka ha u snem 2014, ka seiñ da sdang ko wow pynyoo ya ini i dawa wei ya ki dak pyrchah wei da maham leh wow sdang syndon da i yakhih hadooh wa yoh syndon ya kani ka Ambulance 108 Service hapoh ka thaaiñ.
Kamjooh leh da booh yei kylli ya ka sorkar yei leh chilliang khmat ko ya ka War Jaiñtia. Da kylli leh wa du ha Shillong wa Garo Hills mo wa em ka khlam COVID-19. Ka seiñ da booh ko leh yei kylli leh ya ka ka sorkar MDA hawa cha waroh ki District ka jylla em ka 108 Ambulance ileh won ya ka thaaiñ War Jaiñtia da lehbeiñ kamni?
Ka seiñ da ban ko leh wa i wym em ka 108 Ambulance ha ka thaaiñ nadooh u snem 2014 da pynman wa boon ki mynsien bru kiwa man kiwa maya yong i da dooh noh ki yei mynsien wa kordor i yong ki. Kamtæ ka seiñ ka dawa joor ko ya ka sorkar MDA wow sdang smat noh ya ka 108.
