Ka Myntdu Lions da jop ko ya ka Simsang Sharks da 51 Run ha ka yalehke wa pynthut u slap ha ka Senior Men Challengers Cup ka Meghalaya Cricket Association ha Shillong ynne ka sngi.
Ya ka Myntdu da phah Bat nyngkong heiwa da kamai ki 209 All Out na ki 48.1 Over. Ka Simsang Sharks hawa jubab ha iwi i por da yoh ki 27/3 hadien 17 Over heipor wa wan pynthut u slap. Hadien wa kheiñ deiwi, da pynkylla ya ka thong yong ki cha 188 na ki 42 Over tangwa ym poi thong ki deiwa yoh ki 136 Run deiwa dooh lut ki Wicket.
U Captain ka Lion, u Dippu Ch Sangma da kamai u 62 Run deiwa kynchew lang u Junjun M Sangma (24), Manish Rai (24) wa u Rohit Shah (22).
Na ki 8 ngut kiwa kawang bol ka Simsang da lehbha u Amiangshu Sen (2/24), Akash K Choudhury (2/25) wa u Aravind Singh (2/34) deiwa yoh mar chi Wicket u Mark Ingty (1/15), Sanvert Kurkalang (1/23) wa u Shaisngi Lyngdoh (1/23).
Hawa kdong yei thong ka Simsang da sdang ko suki suki chwa wow wan u slap.
Hadien wa sangeh u slap, u Choudhury da yoh u 37 na 39 bol wa u Wallambok Nongkhlaw (36) heiwa da rah ki ya ka liang yong ki na 50/5 cha 109/6 chwa wow haap u Nongkhlaw ha u Riboklang Hynniewta (3/29). U Choudhury leh da haap u ha u Hynniewta.
Kiwa kwang bol ka Myntdu da yoh ki mar chi Wicket heiwa u Player-of-the-Match u Dippu da yoh u (1/8 na 6 Over), u Rohit Rai (1/10), u Chengkam Sangma (1/13), u Heimon Lyngdoh (1/18), u Purajit Mandal (1/19) u Aryan Borah (1/29).
Ka Myntdu kattu da yoh ko 3 Point (da yoh ko chi Point naka yalehke wa nyngkong hadien wa ieh niedaw wa joor u slap) katwa ka Sharks da rem ko la arsien.
Mynstep ka Symper Panthers daw yaleh nyngkong ko pyrchah ya ka Nokrek Tigers heipor 9:00 waje i step.
