Ka Nokrek Tigers da jop ko hei sien wa nyngkong ha ka Senior Men Challengers Cup ka Meghalaya Cricket Association deiwa jop ya ka Symper Panthers da 50 Run ha Shillong ynne ka sngi.
Ynne u slap da pynthut u arsien wei da hap wow yaleh noh mar 35 Over chi liang. Ka Nokrek da jop ko ya ka kylla khlem wei da jied u Captain Sylvester Mylliempdah wow Bat nyngkong heiwa da ye ki wow kamai 227/8 na ki 35 Over deiwa yoh 6.5 Run chi Over.
U Mylliempdah da kamai u 64 Run wei deilang wa u Krishna Thapa (29), ki Tiger da kamai ki 75 Run neibynta ka Wicket wa nyngkong na ki 13.1 Over.
U Anish Charak won da kamai u 65 na 37 bol wa kynthup ya 3 tylli ki 6 Run wa 7 tylli ki 4 Run.
Ya ka Panther kawa man leh ka sien wa nyngkong wa yaleh ko ha kani ka lympung, da yoh wow pynhaap Wicket da u Md Nafees Siddique 3/39, u Babloo Passah 2/20 wa u Himan Phukan 1/31.
U Captain ka Panther, u Kishan Lyngdoh (27) wa u Tarique Siddique (51) da kamai ki 57 Run neibynta ka Wicket wa nyngkong wei na kiwa wan hadien da lehbha u Swarajeet Das (26). Na kiwa kawang bol ka Tigers da lehbha u Steve Syiemlieh (3/22) deiwa yoh Wicket leh u Mylliempdah 2/32, u Thapa 1/33 wa u Charak 1/35 heiwa kiwa Bat ka Panther da haap lut ki deiwa kamai 177.
Ka Symper Panthers daw yachem ko waka Myntdu Lions mynstep heipor 9:00 waje i step.
