Shillong: I e wai ya ki Bus JNNURM cha ki bru samen da pynsepai ko ya ka poisa sorkar neibhah kini ki Bus da noh sepai ya ki da kiwa chim wai dang thymme tang wow yoh Number Plate leh ym pu yoh.
Hawa klam wa u Montri kam pynroi sor, u Ronnie V Lyngdoh da ong u wa ini i rukom e wai ya ki bus rong soo toh iwa bakla nadooh wa sdang u pynkrehkaam ya ki.
“Ym tip de kammon ka ya soi soskular wa ki kyndon nadooh wa sdang, wei ka soskular toh kawa bakla nadong chadong khlem iwon iwon i yakut wow sumaar næ wow chna pynbha ya ki Bus wa da sih.” ong uni u Montri.
Da ong u leh waka sorkar u chim khia ko ya ini wei daw pyrchang ko wow chna ya kiwa da sih wei ya kiwa ym ye de u chna daw lilam noh ya ki.
U Ronnie da ong u, “Nga da pyrchah O nadooh nyngkong wow pyllai ya ki Bus da ki bru samen wei toh u e kti ya ki cha ka MTC ha ki le snem wa sdang pynkrehkaam ya ki, itæ nadooh u snem 2011 hadooh u snem 2013, tangwa da knieh noh ya ki neidaw wa ym em yoh nong na ki.”
Chooh chooh u Montri da ong u wa ym yahaap wow e ya kini ki kari da u ML01 kam ka kari sorkar.
“Nadooh nyngkong nga ong O wa kini ki Bus toh neibynta myntoi ki paidbah wow pynsuk ha ka lai ka wan ha i dor wa duna. Man ko ka kaamram yong nga wow pyntikna wa toh ya ka poisa paidbah toh u pynemkaam ha ka rukom wa toh wow pynyoh myntoi ya ki paidbah ym toh ya kiwa pylla Bus.” da pynrap u Ronnie.
Da pyntip u leh wa daw pynman u ya ka sylli wa syndet ya kini ki bus wei daw chong bichaar biang ya ka soskular wa soi ha pyrdi ka sorkar wa kiwa pyllai ya ka Bus.
Discussion about this post