Khliehriat: Ynne ka sngi da pynman yaka yalang hapyrdi ka JAC wa ki karkhana pynmih khyndaw-bilat wa ki bor District ka East Jaiñtia Hills kawa da man kawa sepai khlem mih kawon kawon ka rai kawa khaddooh.
Kani ka yalang toh kawa man hapyrdi ka All Jaiñtia Cement And Clinker Transporters Association (AJCCTA) wa ka Jaiñtia Hills Truck Owners Association (JHTOA) chirup wa ka Meghalaya Truckers Union (MTU) da yachem ki ya kiwa kitkaam ka All Jaiñtia Cement Manufactures Association (AJCMA) kawa man ka seiñ ki karkhana khyndaw-bilat, katwa neiliang ki bor district won da em u DC wa u SP ka District.
Ha kani ka yalang da pyrchang wow yaklam hajrong ka hukum ka sorkar wa da pynmih ha ka 13 Duyatra uni u snem heiyatoh wa ka bai kit mar ki truck wei neiliang ka JAC da dawa wow pynkrehkaam ya kani ka jooh ka hukum heiyatoh wa i kit mar na wei cha ki karkhana khyndaw-bilat.
Hadien ka yalang hawa yaklam wa u President ka AJCMA u RK Pareek da ong u wa ka hukum ka sorkar ym em klam che ko wei i dor thymme man i iwa heh wei iwa ymye u pynkrehkaam.
Da ong u leh wa ha ka yalang da rai wow klam pynbait ya ini i kaam hapoh chi tayaw wei da pyntip u wa i kit ya i khyndaw-bilat na ki karkhana dang pteiñ i.
Neiliang u Nidamon Shullet uwa man u President ka JHTOA, da ong u wa da wan ki cha ka yalang dei angnood wa daw ye u pynbait wow pynkrehkaam ya kani ka hukum tangwa ym em u poi cha kawon kawon ka rai wei neiliang ki tre truck katkam wa man hi doohnong bha ki katni katwa kamtæ da rai wow kset noh ya ki truck wei wow sangeh chwa u kit ya ki mar cha kini ki karkhana.
Da pynsñiaw u leh yei mynsien wa diaw hadien wa phah pynbait u DC ya ki arliang hajrong ini i kaam hapoh chi tayaw deiwa ong wa neipor cheipor khut yalang ki ya ki karkhana tangwa ym em mano ki wow wan cha ka.
Da kyntu biang u ya waroh ki tre truck wow sangeh chwa ki wow kit mar kat hadooh wympu ye u pynbait ya ini i kaam.
