Ka Ryntih SC da jop ko ya ka Shillong Lajong FC da 3-0 ha ka yalehke wa 14 ka Shillong Premier League 2021-22 wa pynman ha Third Ground, Polo Shillong ynne ka sngi.
U Wilbert Marbaniang da yoh u wow thap ar tylli ki kool ha ka minit wa 20 wa haka 67 katwa u Allen Lyngdoh Nongbri da yoh u wow thap lyngba ka Penalty haka minit wa 48.
Chwa ynne, ka Ryntih da yoh ko 6 Point deiwa jop arsien wei rem chisien katwa ka Lajong da yoh ko 1 Point na ki le tylli ki yalehke.
Ka Ryntih da i jop ynne da yoh nyngkong ko deiwa yoh 9 Point deilang waka Mawlai SC kawa da tam da ka Goal Difference (+7 da +5). Ka Mawlai daw yaleh ko sa chisien katwa ka Lajong dang em ko heiwa ynñiaw wei kawa ye u chah pynhiar kyrdan.
Mynstep, ka Rangdajied United FC (5 Point) kawa em he wa le daw yachem ko waka Langsning FC (4 Point) kawa em heiwa san heipor 4:00 waje noh chariñ ka sngi.
