Ka Mawlai SC da jop suk ko ya Ryntih SC da 5-0 ha ka yalehke wa 19 ka Shillong Premier League ha Third Ground, Polo ynne ka sngi.
U Pynbha Suting (45’), u Donlad Diengdoh (48’), u Manbha Iawphniaw (53’, 81’) wa u Samuel Lyngdoh Kynshi (86’) toh kiwa da thap kool ha kani ka yalehke kawa jem chiliang wei kawa jop boon kool dooh ha kani ka samoi ka SPL.
Chwa ynne, ka Mawlai da em ko 12 Point katwa ka Ryntih 9 Point, kiwa man leh kiwa yoh nyngkong wei kawa yoh wa ar. Ka Mawlai deiwa yoh 15 Point da tam ko da 6 Point ya ka Ryntih kawa em hei wa ar. Da ini da man leh ka sien wa san khlem chah thap ka Mawlai iwa mut wym pu em chah thap ko chi kool leh.
Mynstep, ka yalehke u man ko hapyrdi ka Langsning FC (7 Point) waka Malki SC (4 Point) heipor 4:00 waje noh chariñ ka sngi.
