Jowai: Kam chibynta u chim yaki laad yada khamtam ha kam ini i por wa u khñiang khlam COVID-19 da ktah u yaka ri waka jylla, ynne ka sngi neiliang ka Jowai Municipal Board da chim ko yaka luti wow siat dawai yaki thaw paidbah wa em hapoh ka chnong Jowai kiwa haap hapoh ka Municipal deiwa ya krehlang ka chnat i chait i khiah, ka chnat saam umbaam umdih waki waheh chnong waphær waphær.
Hei yaklam waka CEO yong ka Jowai Municipal Board ka RS Manner, da khana ko wa em kamwa 24 tylli ki dong hapoh Jowai wa haap hapoh ka Municipal wei i pynkhreh wow siat dawai toh yaki thaw paidbah wa em ha ki dong ki chat kamjooh leh yaki yaw ki haat.
Ini i pynkreh u neh ko kamwa chitayaw haroh wei da booh ryntih leh yei por, kamtæ ynne ka sngi katwa toh ka sngi nyngkong da sdang chwa haki yaw ki haat, ki thaw pynyieñ kari (Parking Lot) wa em ha Iawmusiang waki Petrol Pump wa em ha Jowai.
Haka sngi wa bood won daw em i siat dawai yaki surok ki, ki Park, ki Community Hall wa em hapoh ka Iawmusiang, Newhill, Moosalyngkat, Salaroh wa kiwi ki thaw paidbah.
“Ini toh i sdang wei neipor cheipor hi leh daw em hi i pynkhooid neiliang ka Jowai Municipal Board katkam wa joh i bor hanla em hapyrdi i duna ki wakreh leh,” ong ka RS Manner.
Da pynrap haroh ko wa kini ki wakreh yong ka JMB toh kiwa da dep chah sikai hei bynta waphær waphær wa yatoh wa u COVID-19 nalor wada pynbiang leh chaki yaki tiar yada wa kynthup yaki PPE wa kiwi kiwi.
Sa iwi leh i pynkhooid yaki thaw paidbah toh kiwa man rap tngit, khnang wa ki khñiang kjut khamtam ha kam ini i por wa em khlam ym yohlaad ki, pynkut ka Manner.
Discussion about this post