I kynaad ha Lapangap hapyrdi ki Pnar wa ki Karbi da pteiñ biang i ynne ka sngi deiwa ya siat watur mar chiliang heiwa da emlang boon ki pulit ka Meghalaya kiwa da lai hiar ynne ka sngi wei neiliang ki pulit ka Assam leh em ki chiboon kiwa rah suloi kiwa da pynyang suloi leh ya ki paidbah.
Ha ini wa jia, ki pulit ka Assam da siat ki leh da ki Tear Gas kamwa 5 tylli chapoh Meghalaya ha ini i thaw rep ki bru ka Lapangap wei da em leh ki kattu katni ki Pnar wa mynsoo wa kynthup ya u Nibait Sariang, u Ris Shadap wa u Sangait Joit.
Ini da jia i hadien wa ynne i step ki warep ka Lapngap kiwa em 4-5 ngut da lai ki cha lyngkha yong ki hi yow thwat khloo thwat stiar tangwa da em ki Karbi kiwa da yang cha chiliang hali kiwa da sdang wow siat watur wei heini i por da mih ki paidbah na waroh arling wei da sdang biang ka yaleh deiwa ya siat watur wei na ki Karbi da em biang kiwa pynemkaam da ki ryntieh.
Hadien kattu katni por da poi leh ki pulit ka Assam wei da tia ki Karbi cheiliang i thaw ki Pnar wei da thwat ki ya u kba wei da thang ki ya ar tylli ki trep wei da phut ki leh ya u chirmit wa da thung hajan ki hali.
Ki pulit ka Assam ha ini i por da siat ki kamwa 5 tylli ki tadong Tear Gas chapoh u pood ka Lapangap wa em ki paidbah katwa ki pulit ka Meghalaya won pait hi-eh ki.
Chooh chooh ki pulit ka Assam da mang ki ya ki suloi yong ki cha kiwa chong chnong ka Lapangap khlem da beh ya ki Karbi, wei dei tieñ da ran ki paidbah ka Lapangap chadien tangwa i ya siat watur dang joor i.
Ki pulit ka Meghalaya da yaleh ki wow pyn jai-jai ya ki paidbah tangwa ki paidbah ym ngait de ki ya ki bor pulit neibhah wa ini toh i hok i kynti yong ki hawa ki wa thung ki toh u yoh u ah ya u kba na ini i thaw.
Discussion about this post