U Additional Director General of Police (Law & Order) ka jylla Manipur u Arvind Kumar da suba wa da siat u pyn ya oo hi daka suloi u ha kamra kreh yong oo ha 1st Manipur Rifles Complex ynne ka sngi.
Ini da jia i heipor 1 waje i sngi heiwa da leh u ya ini hadien wa dep wow pynman yaka yalang klam kaam ha kamra krehkaam u deilang wa kiwi ki pulit wei da kit ya oo cha Raj Medicity Hospital wa em ha North AOC.
Katkam ka yutip wa da yoh, u kuli wa 0.32 mm da psiah u na tangbæiñ u wei da mih u na i bynta i ngab u.
Hadien wa sumaar ya oo, daw pynkit cha Delhi yow yoh chooh chooh u yei sumaar wei kattæ da lait chooh u nei maa, da pyntip u Chief Secretary ka jylla u J Suresh Babu. Deiwa pynrap leh wa ym tip neiyi i daw wa da leh u yeini wei da wan man u kam u ADGP hapoh Manipur la 4-5 bnai.
Neiliang won u Director General of Police u LM Khaute uwa wan pait ya oo hapoh thaw sumaar, da ong u wa da dep yachem u wa oo ha kini ki sngi wa da dep wei ym em yoo u wa phær u næ wa sñiawsih u.
Neiliang won kiwa pynlai yaka Hospital da ong ki wa da takha i bynta i jabeiñ u nakhmat kamjooh i khlieh u nei bor u kuli tangwa da lait u nei maa deiwa pyntip leh wa da wiar i sñiaw u ha ka kjat timun u.
