U bru wa 20 snem i rta da chah siat yap u ha u chipai ka BSF ha Cooch Behar, West Bengal ha i chnong khappood wa ka Bangladesh iwa tip kam i Bhoram Payasthi iwa da jia hei step ka 3 tarik uni u bnai.
Ki BSF da ong ki wa uni u bru wa tip kam u Jahanur Haque toh uwa emkti ha ki kaam khayi pyrchah aiñ ha khappood tangwa kiwa ha-yung ha-sem u da kyntait ki yeini deiwa ong wa toh uwa kreh mylla.
Ki BSF won da ong ki wa uni u bru toh uwa man kam u dkhot ki bru wa khayi mar pyrchah aiñ deiwa ya krehlang wa ki bru kiwa em cha kylla pood.
Ini da jia i heipor 5:00 waje i step heipor wa dang lai uiñ sonteri uwi u BSF wei da yoo u ya ki kattu katni ngut ki bru kiwa da mut wow ah ya ki naar chieh wa kær pood wei manda poi u hajan ki da yalang ki oo deiwa sai tari wei da sdang ki leh wow tba kti oo.
Heini i por da maham u wym toh u tia chajan wei da siat u ki heiwa da toh kuli uwi wei da yut noh kiwi mar ya jia ini.
U Haque toh uwa chong chnong ka Bhoram Payasthi ka Dinhata-I Block.
Ka Rina Bibi kawa man kam ka bei u, da ong ko wa u khon ko toh uwa kreh mylla ha Bengaluru wei dang liwan yung u ha kini ki 10-12 sngi.
Da ong ko wa da pyntip cha ki yeini hei step wei da chem yei metyap u hajan u pood wei da suba ki wa chah rah u ha ki BSF najan yung u wei da pynyap ki oo khlem daw.
Chooh chooh da ong ko wa em ki yei thaw rep wa em cha kylla pood wei da em pyrtuid ko deilang u kurim wa u khon ki yow ye ki u lai cha kylla pood yow lai rep.
Discussion about this post