Jowai: Ka seiñ All Jaiñtia Studénts Union – Shillong Circle (AJSU-SC) da pynsñiaw ko yei sñiawkhia wa joor yei dooh yei mynsien yong kawi kawa sikai RMSA ka skur wa em ha Shangpung ka (T) Noami Rejoice Lytan wa chong wa sah ha Dulong, Jowai ha West Jaiñtia Hills District hei ya tyrrah kari ha Soomer ka laad sarok Bypass Jowai.
Ka seiñ da phah ko leh ya ka khubor sñiawlem cha kiwa ha yung ha sem yong ka wa u blai u emlang u wa ki deilang wa u khon yong ka uwa dang 7 snem i rta wow yoh u yei doh i pran wa chait wa khiah.
Ka seiñ da beiñ joor ko ya ki Jowai Traffic Police neidaw wym jooh yoo wa em ki pulit wa pyllai kari ha kani ka thaw wa jia i ya tyrrah kari.
Ka seiñ da ong ko leh wa da tip ko wa kani ka thaw toh iwa maa bha neibhah boon ki kari khamtam ki Truck kiwa lai kulmar neiliang ki liang sarok wa bakla. Ka seiñ da kylli ko ya ki Jowai Traffic Police wa iyi mut wow booh ya ka thaw yieñ pulit ha pyrdi u sarok Bypass.
Da kylli leh lada toh wa pynemkaam katkam wa chna ya kani ka thaw pynlai kari cheiwon ki pulit heipor wa tyrrah ka Truck ya ka kari kamai iwa pynyoo wa ym em leh ki pulit wa ym em pynemkaam hok yeiwa da pynkit ha ki.
Chooh chooh ka seiñ da ong ko wa sñiawphylla hawa lai luti na Jowai Bypass da yoo ki wa man ki por ki pulit wa pyllai kari em por ki wow sylli ya ki kari wa lai tangwa ym em por ki wow pyllai kari kamtæ ka seiñ da kyntu joor ko ya ka sorkar wow chimkhia yei leh habra ki Traffic Police Jowai wei wow leh ki yeiwa emkaam.
Da kyntu ki leh ya u SP ka West Jaiñtia Hills District wow chimkhia wow booh pulit wa yieñ waroh chi sngi ha Soomer Bypass Jowai wa ha Laad Bypass Mukhla yow lait na i jia wa sñiawsih.
Da kyntu leh ya ka yung krehkaam ka PWD wow booh noh ya da ki Speed Breaker ha kini ki ar thaw kamwa da dawa da ka seiñ RJYF.
Kani toh katkam ka khubor na u Public Secretary ka AJSU Shillong Circle.
Also Read: Khlaad ka wi ka manbei ha i yatyrrah kari ha Soomer
Discussion about this post