Shillong: U montri rangbah ka jylla u Conrad K Sangma da ong u wa em chiboon ki laad khayi wa ka ri Bangladesh tangwa emkaam wow pynyinsur wow pait yei rukom chalan ya ki jait mar khamtam wow pynbiang ya ki luti syngkieñ.
Hawa yaklam wa kiwa pathai khubor, u Conrad da ong u wa em i eh i khoo hajrong kani ka kaam heiwa da batai u leh yeiwa chem u heipor wa lai u cha ka ri Bangladesh ha ka tayaw wa dadep wa i yaklam wa ka montri rangbahdooh ka ri Bangladesh ka Shiekh Hasina.
Da ong u leh wa emkaam wow pynmiat ya ki yung krehkaam ka sorkar pyrdi kam kawa em ha Dawki wow pynsuk ya ki paidbah ha i lai i wan na waroh arliang.
Ha i lai cha ri Bangladesh, da yaklam kammon wow yatoh hapyrdi kiwa khayi hapyrdi kini ki ar ri khamtam kiwa ye u sdang u seiñ khih seiñ kreh waphær waphær.
Katkam i ong u Conrad, i myntoi na ka ri Bangladesh toh hei wow yoh u yoo ya ka thaw wa chah kset u Tirot Sing ha Dhaka, wa ka Jaiñtiapur kawa man ka thaw sah u syiem ka hima Jaiñtia dang nachwa.
Chooh chooh da ong u leh wa ym man i iwa suk wow leh yei kaam branbran tangwa daw man ko kawa chimpor wow wanrah yei kylla neibhah daw emkaam wow chna ya ka yung krehkaam, wa kiwi kiwi khnang wow smat ki kaam hapyrdi ki ar ri.
Da ong u leh wa kawi na ki laad ya ka jylla Meghalaya toh wow pynkhlan ya i pynmih bordiñ wow dai cha ri Bangladesh wei katni em kamwa 7 tylli ki project wow pynmih bordiñ 700 MW khnang wow ye u dai cha ka ri Bangladesh.
Hajrong u sarok Shillong-Dawki, u Conrad da ong u wa i kreh da lai i chaaid chaaid katni wei dang yaklam wa ki shipai wow e thaw wow chna ya ka sarok wa ka NHIDCL wa kiwi kiwi.
Choh chooh da ong u leh wa ka sorkar jylla dang thooh laad ko wow yakrehlang wa kiwi ki ri kam ka Bhutan hajrong ka Bangladesh.
Discussion about this post