Ka JSU Khliehriat kamwa jooh yieñ ko ha ka yurim wym hoi u pynjæd pynpra ya ka bei rymaw wei wym toh leh u e laad ya kiwon kiwon wow wan kamtre ya ka ri Jaiñtia wa maya, da chim ko yei smai ynne ka sngi wa la kammon kammon leh ym e laad ko ya ka yung krehkaam u Deputy Commissioner yong ka East Jaiñtia wow pynman u ya ka Public Hearing næ ka pynsñiaw paidbah ka Star Cement kawa kwah wow pynheh chooh chooh ya i tih moochuni sa na ka chnong Brichyrnot.
Kani ka Public Hearing toh kawa daw pynman ha pchem ka yung krehkaam u Deputy Commissioner ka East Jaiñtia Hills ha ka 21 tarik uni u bnai, wei ka seiñ da pyrchah ko ya kani ka Public Hearing yow lait nei chah ktah ka thaaiñ Narpuh.
Neiliang ka seiñ da maham joor ko wa ym chah ko u pynkhleh tungtoh ki heh District ya ki kaam wa yatoh wa ka Elaka Narpuh cha Elaka Rymbai.
“Kani toh ka kaam yap kaam im yong ka Elaka Narpuh, ym em hok ki paaid wa chong chnong ka Elaka Rymbai u tuklar hajrong ini. Ki waheh wasian ka Elaka Rymbai ye phi u pdiang yeini?” da kylli u Edmund Sumer, Publicity Secretary ka JSU-Khliehriat Circle.
“Da ngiah i wow chah pynbiej wei wa da ngiah hi i leh yei pynbiej, sorkar wai noh kitu ki chkoor wa khlot phi yow tip phi wa ka JSU katwa dang kaweh ka lama ko, ym chah ko u lilam phi chi inchi i thaw leh kawa toh ka yong ka Ri Pnar yong i neibynta i myntoi ki kattu katni ngut,” pynkut u Sumer.
