U Symbood Montri Rangbah ka jylla, u Prestone Tynsong uwa man leh u Chairman ka Regional Committee wa pait ya ka Ri-Bhoi District da ong u wa lada emkaam wow chong wei pynche biang, ka sorkar da man ko kawa smat wow pynche, tangwa i pynbait biang ya ka soskular namo ka Memorandum of Understanding (MoU) ym man ko kawa suk.
Ya ini da ong u hawa kylli hajrong wa em ki seiñ kiwa em ha ka sorkar kiwa kwah wow phah pait biang ya ka soskular hadien wa da mih i pyrchah na kiwa boon wa lang khamtam na ki tre chnong wa ki tre thaw ha khappood.
Da ong u wow pynbaad wa ka soskular wa dadep soi da ka Meghalaya wa Assam wow pynbait ya u pood ympu man ko kawa biang, itæ da man iwa bakla neibhah wot ka Assam leh em i wym hun wei da em i pyrchah wa joor na ki paidbah yeiwa dooh noh ya ki thaw.
U Prestone da ong u leh wa ka sorkar da phyllu yumut bha ko wei da lai pait ko hadooh ki khappood, deiwa pynrap wa katkam i sñiaw yong oo, lada kwah sakhiat wow pynbait chisiendon ya ini i kaam hap pynbiang lang, wei ini ym mut wow ong wow dooh lut ka Meghalaya næ wa ka Assam u dooh lut ko, tangwa emkaam wow lai hapyrdi wow biang lut waroh.
