Shillong: U General Secretary ka Hynñiewtrep National Liberation Council (HNLC) uwa da wan pyndem ynne ka sngi, u Cherishsterfield Thangkhiew da ong u wa i mih yong oo naka HNLC ym toh iwa yut u deiwa ym sniawthooh wei man ko ka rai yong oo samen wow chong ngiah noh naka seiñ.
U Cherish da ong u wa smat u wow man kam u ksiang yong ka sorkar deiwa kam wa hadooh katni dang em hi u ka yatoh wa ki dkhot ka seiñ.
“Hadooh katni nga dang em O ka yatoh wa ki dkhot ka seiñ wei lada ka sorkar ka emkaam ko ya nga hadien wabood wow yaklam suk wei chong ko ha ka sorkar wow thooh leh ya kiwi ki bru wa biang.” da ong u.
“Lada khut ya ka seiñ lyngba ki kot khubor na chiliang cha chiliang duriaw ym man ko kawa suk wei ym poi ko cheiwon cheiwon leh tangwa emkaam wow em u ksiang. Lada em u ksiang ka seiñ ye ko wow wan khylliap leh, nga ye O u wanrah wa ki tiar yaleh, katni ym ye o wow wanrah ya ki tiar ya siat wei lada leh o ya ini da chah kem O pyn na Bangladesh,” da ong u Cherish.
Hawa kylli won wa ini i wan u wow pyndem ym toh man ko kam ka dak wa da kut ka HNLC, da jubab u deiwa ong, “Nga ym ye O u ong wa da kut ka seiñ neibhah ka em ko kiwa boon kiwa lang ym toh i rai yong uwi donhi wei chong ko leh ha ki rai yonglang.”
U Cherish da ong u leh wa i wan pyndem u toh i rai yong oo samen wei ym em wa pynbor ya oo wei ym toh leh wa mut ko wa da kut ko HNLC kattu.
“Ha ka seiñ i da em i ka por wow chong ngiah tangwa nga wan O wow e kti noh ha ki bor sorkar,” da pynksan u.
Ha i jooh i por leh da ong u wa ya ini i rai yong oo toh wow chong ngiah noh naka seiñ.
Discussion about this post