Da: U Chandame Sungoh
Dapoi ka kutsnem da poi ka New Year,
Ki ru kiwa yoh tæ baam dohsniang dohsyiar;
Kynthai chynrang dih kiad dih beer,
Cha nongkyndong ka harak ka sadhiar.
Pyrdi synyaaw kamwa da che kdaar,
Wa thang bomb thang pchær pchær;
Em leh kitu kiwi ki ar
Cha kdong wa yait rood yait kiar.
Ya e khublei snem thymme kylliang,
Deiwa ong, yow yoh yei chait yei nang;
Yow mankhih mankhan ka kamai kajih,
Yow chem yei bha yow lait nei sih.
Yow pynhun yei ngait, chongchit i sñiaw,
Ya chaad hadooh wa kyllooh i chnong i thaw!
Kynthai chynrang, khynroo tymmen,
Ya chaad sñiawbha chisien chisnem.
Tangwa kat ha nga samen na-ai,
Ini waroh toh i rong pyrthai;
I Happy New Year, toh i pyndep rukom donhi.
Boi chibet da yap leh u tip phi?
Hei im bru ong i, “To kmen to sñiawbha”.
Tangwa lait hi mo nei chitom saja?
Ong i, “Ya Enjoy bait kat dang im”,
Ka sngi khaddooh toh i yap i tim.
Khubor snem thymme, deini i poitri,
Ympher ladam ngait ladam pdiang phi;
Lehbha yow bru, lehbha yow Blai!
Itæ donhi wa kor tam ha pyrthai !
Chihajar Ngooh!
