Da: U Soolangki D. Laloo
I bor yong oo katu dalut
I rta yong oo kattu dakut.
Tiap, tiap uni dawan dow wi
Snem thymme kattu ha i.
Hukum nachwa nalap da em
Wym chah ka nia wow neh chi slem.
Kai im bru heini ha pyrthai,
Chisien u wan, chisien u lai.
Snem rim kattu na i da jngai,
Wym yachem de heini ha pyrthai.
Ya me chiboon kiwa beiñ, wa roh
Yei sih, i bha ha me wa yoh.
Snem rim kattu sadu hei kynmoo,
Bru pyrthai kat kiwa yoo.
Yei bha wa mih ha me
Chiboon ki wow makhane.
Pyrdi synyaaw Khat-ar waje
Snem rim da lai, wan snem thymme.
Dei yachaad, ya kmen pdiang snem thymme
Chi-yaw, chi-yaw hadooh wa che.
Khynnah, waheh, chynrang, kynthai
Kylleiñ soodong wa ya uiñ, ya lai.
Dei ya chaad, ya rwai sur har rukom
Yow snem thymme wa pdiang burom.
Miet snem thymme katwon yoobang
Wa ya chaad, ya kmen u waboon walang.
Khynnah, waheh, kynthai, chynrang
Kam chi-payu chirrup deilang.
Snem thymme kattu ha i da wan,
Thij hei longbru, manbru deiwi tawan.
La hei khih i khan næ purae, puthi
I im to sdang seiñdur deiwi.
