Ha ri-loom Jaiñtia nadooh ka 12 tarik uni u bnai hadien wa da mynjur ka seiñ kiwa kamai kari ka All Jaintia Tourist & Commercial Vehicle Association yei tyrwa wow pynkrehkaam yei dor kari wa da dep pynbna ka sorkar hawa sdang u snem 2020, heiwa da pynku yei dor bai kari khlem dawa de wow pynhiar yei dor phniang kari, da mih i khñium i ood naki paidbah kiwa da ym sñiaw yahap de yei ku i dor bai kari.
Kiwa boon ki paidbah da sñiaw ki wa da chah chet kylla ki heiwa kiwa boon da pynsñiaw ki yei kyrchaan wow yakhih pynhiar dor phniang katwa u yoo mar ya yoh dor thymme mylliñ wot kiwa kamai kari yei eh ki paidbah.
Uwi na kiwa chong kari wa lai na Jowai cha Ladrymbai da ong u wa chwa ka Lockdown i dor phniang da man i T. 65 hadooh T. 68, i dor bai kari da man ko T. 50 hadooh T. 60 na Jowai cha Ladrymbai
tangwa kattæ da poi T. 90 hadooh T. 91 i dor phniang, ka bai kari won da poi ko T. 100.
Da ong u wa kani ka bai kari wa katni da ktah ko chiboon yei lai i wan heiwa i rukom thap bru leh deiwa thap palat yeiwa chah (Seating Capacity) deiwa kat dang yoh bru da thap ma thap.
Neiliang kiwa khih mylla sngi leh da ood ki wa ini i ku ka bai kari toh iwa ym em de pyrkhat yaki neidaw wa lut i nong ki du haka bai kari kamjooh yaki khynnah skur wym em booh dor wa duna neibynta yong ki.
Katkam wa yaklam wa ki bru paidbah kamjooh deiwa yoo yei pynsñiaw ki bru haki Social Media khamtam ha Facebook hadooh kiwa kynjoh ktien cha u Wyrta, ym em ki bru paidbah wa kyrchaan yeini i pynku dor wei da tim lut ki ya kiwa kamai kari deiwa ong wa chim kabu kiwa kamai kari dei wym pyrkhat de yaki paidbah.
Da em leh wa ong wa lada hiar dor i phniang leh ham yooluti wa daw pynhiar yei bai kari heiwa i rukom pynu dor bai kari da man ko lada ku 10 tynga i bai kari leh ku wot 10 tynga wei lada kamni manda yoo ki bru wa hoi khih kiwa kamai kari daw boon kiwa daw sai kari kamai iwa daw pynhiar yaka yaw ka haat kiwa kamai kari.
