Shillong: Kiwa yahkhmat ka BJP hapoh ka jylla da sñiaw danda ki yei klam u MLA ka Mylliem u Ronnie Lyngdoh hei yatoh wa chimbynta ki heh niam ha ka yalang wa pynman da u Nalin Kohli, BJP National Spokesperson kamjooh wa pait ya ka jylla.
I thong ka yalang toh wow ya phyllu yumut ya ki phang wa ki paidbah ym sñiawthooh ki wei ymtoh chaphang ka Election 2018. Ym em leh iyi iyi i leh wa cha lyndet iwa pynman ya kani ka yalang wei i thmu hi toh wow wanrah ya ka synchaar wa lait na i baam tooh.
Ka Party leh da ong ko wa emkaam ki MLA u sñiawthooh ya ka riti synchaar ka ri India kawa e hok ya waroh wow jied ki jar jiar ka niam katkam ka Article 25 & 28.
Hei yatoh wa ong u Lyngdoh wa ka BJP kwah ko u pynkup ya ka ri du iwi donhi i rong, da pynkynmoo ya oo wa ha ka jylla Goa ki MLA wa jop na ka BJP kiwa em 13 ngut, 7 ngut toh ki Christan.
Ka party da ong ko leh wa hapoh ka jylla ki niam ym jooh embynta ki ha ka siañ hima sima wei ym em hi leh kwah ko u sdang kam itæ.
I kam ka Congress wa ka BJP da leh bakla ko ya ka riti synchaar ka ri sma kaam politics i bar yeiwa pyrkhat ki yei hok ki bru.
Neidaw wa ym em buit de ki wow yaleh wa ka BJP kawa dang khlan katwa dang lai ki sngi da chim kabu kiwa boon ya ka yalang yong ka wa ki heh niam kam u bru wa ngam um ha duriaw uwa ksoh ha u phlang yow lait na i yap.
“Lada u Ronnie ym ngait uwa ha ka yalang wa pynman hapyrdi ki heh niam ym em iyi leh wa klam chaphang ka kaam seiñ hima sima ye u lai yachem wa kiwa wan chimbynta.” Da ong ka seiñ.
“Hei yatoh won wa i chah khang tih mooyong ha ka NGT neiyi i daw wa chah pynbaad cha ka BJP?” Da kylli ka seiñ. Da kylli ko leh cheiwon ka Mining Policy wa neiyi i daw chimpor wow chna ya ki kyndon tih mar pohkhyndaw?
Kani toh katkam ka khubor na u J.A. Lyngdoh, BJP State Vice-President Meghalaya Pradesh.
Discussion about this post