Shillong: Ka Public Account Committee (PAC) da chong yalang ko kawa ar sngi wa ki chnat waphær waphær wei da pynñiaw ko yei wym hun ya i krehkaam ka chnat Tourism ka jylla khamtam hawa yatoh wow chna ya ka madan yalehke Golf ha ka chnong Pongtung, East Khasi Hills.
Hawa yaklam ynne ka sngi hadien ka yalang, u dkhot ka Committee, u Himalaya Muktan Shangpliang da ong u wa ka Committee ka sñiaw ko wa i chna ya ka madan lehke Golf næ ka Golf Course ha ka chnong Pongtung kawa em ha wah ka chnong Pynursla da man ko kawa pynlutke ya ka poisa paidbah neidaw wa kani ka chnat ym ye ko wow pynche ha kawon ka rukom u pynemkaam ya katai ka madan.
“I pynlut neibynta katai ka madan da poi ko hadooh T.2.36 klur, wei hadooh katni ym pu em pynman ka yalehke ha katai ka madan, i sñiaw i wa ini da man ko ka pynlut kawa ym yahap,” da ong u Shangpliang.
Chooh chooh da ong u Shangpliang wa ka PAC da e por ko chibnai ya ka chnat Tourism wow pynche ya i chna ya katai ka madan wei kammon kwah ki wow pynemkaam yaka wei heiwon i rukom.
U Shangpliang da pyntip u leh wa ka PAC da thooh yutip ko hajrong i kam kani ka chnat wa ya ka Croborough Hotel kawa da sahteiñ kattu la 30 snem wa daw ye u wai ya ka ha u snem wow wan hanlada ki duna dang boon ki wow pynbiang.
“I da e por i leh ya ini chibnai ya ka chnat Tourism wow pynche, i da paan yutip i leh ya ka soskular wa i rukom e wai ya katai ka Hotel neibhah hadooh katni ym pu em ka dak wa daw ye u wai ha ka por kamwa da kam,” da ong u Shangpliang.
Discussion about this post