U President ka NPP Meghalaya uwa man leh u Symbood Montri Rangbah, u Prestone Tynsong da ong u wa da kyrpaad joor ya u MP ka VPP waka Congress wa toh u khut noh ki wut-wut mar sein man ka dorbar Parliament wow wanrah noh ya ka Central Bureau of Investigation (CBI) waka Enforcement Directorate (ED) khnang wow takit ya ki Montri sorkar ha kani ka jylla khnang wow ya che kdar i chah pynbaad baam tooh ha kani ka jylla.
Hawa klam ynne ka sngi wa kiwa thoh khubor, u Prestone da ong u wa i pynbaad baam tooh pyrchah ya ki Montri ka sorkar MDA toh ka wym ye de u batai, wei khnang wow tip ki paidbah waroh lada toh iwa sakhiat næ ym toh, bha ya u MP ka VPP wow yaklam noh waka sorkar pyrdi yow phah wan da ka CBI wa ED.
Da ong u wa u pdiang sñiawbha u yei klam u President ka VPP, u Ardent M Basaiawmoit wa toh u phah ya u MP yong ka Party wow wanrah noh ya ka CBI wa ED heini ha Meghalaya, kamwa da ong u.
U Prestone da ong u wa ki da klam chi klam ki du yeitæ i baam tooh wei da yaleh Election leh hajrong kani ka phang wei yow che kdar sñiawbha wanrah noh smat wei ka sorkar MDA u pdiang sñiawbha ko khnang wa ki paidbah leh u tip lada toh iwa sakhiat namo ymtoh wei lada toh kammon u pyrkhat wei la ymtoh kammon u pyrkhat.
Discussion about this post