Ka Synjuk Waheh Shnong Ri Jaiñtia (SWSRJ) ynne da yoh ko u yoo yei rukom leh tangdep da ka JHADC hawa e ya ki ID Card cha ki Waheh Chnong kiwa da yaleh (Apply) na ka Administrative Officer yong ka Council dei wym em dat Seal pyn-ar kylla deiwa pynemkaam da ka kot song channa hi-eh, tangwa i dor yong ka chongdor ko T. 100 kawi.
Ka synjuk da ong ko wa hei yong sakhiat da toh sap wow yoh ya ka ID kawa emdor kawa pynkupbor wei wow pyntipmit ya ki Waheh Chnong wa da yoh sanad na ka JHADC tangwa lada kamni, heiwon ma-ai i dur u kheiñ burom næ ñiawkor kiwa boon walang ya ka iktiar næ i bor waheh chnong, deiwa khlem kdaw ya ka kyndon aiñ yong ka JHADC heiyatoh waki Waheh Chnong ha kani ka Identity Card khnang yow pynsuk ko kam heipor Curfew, heipor wa eh, por wa saja, por miet, por lai luti syngkieñ kamjooh hawa pyntipmit ha ki yung krehkaam ka sorkar.
Kamtæ ka SWSRJ ym ye ko u pdiang yeini i leh tangdep kawa yoo sarom wow pait da kiwi tawan ki jaitbru.
Ka synjuk da dep e ko leh ya ka dorkhat cha ka Council heiyatoh wa i rukom chna ya i dur yong ka ID deiwa booh lang ya ka chap (Logo) yong ka Synjuk chirup wa ka muhor yong ka JHADC ya ka rukom pynwandur tangwa ym em u ap u sñiaw ko yei kyrpaad yong ka SWSRJ na i por cha i por wot nadooh wow leh yei pynkylla (Amendment) ya ka aiñ wa yatoh wa ki kaam chnong, kaam thaw kamjooh leh ya ki Waheh Chnong. Kamtæ lada ym khutlang ka JHADC u yaklam ya pynbait, ka Synjuk ym bien ko u pynemkaam ya ka ID wa chna wow e ko cha ki Waheh Chnong, pynkut ka wyrta na u President yong ka SWSRJ u Army Lipon.
