Ki ar seiñ napoh ka thaaiñ War Jaiñtia, ka Khasi Students’ Union (KSU-War Jaiñtia Circle) wa ka Federation of Khasi Jaintia & Garo People (FKJGP-War Jaiñtia Circle), da pynsñiaw ki yei sñiawdiaw hajrong i pynmih hukum pynman Containment Zone ya ki kattu katni tylli ki chnong katwa ya ka khayi pateiñ baar ri wa ka Bangladesh da e laad wow lai bait katkam ki kyndon.
Ki ar seiñ da kyrpaad ki ya ka sorkar wow leh kamjooh ya ki paidbah na ki chnong ki thaw ym toh wow leh chiliang khmat neibhah wa yoo wyrai wow pait ya i eh ya ki paidbah khamtam kiwa dooh wa duk wa chaniah na i mylla sngi kiwa da maad yei eh deiwa kset ya ki katwa ya ka yaw baar ri lai bait ko kawmwa jooh.
Da ong wa ini ym toh i leh bichni ya kani ka khayi khappood deiwa kwah wa ki paidbah leh u yoh lang ki yei hok. Ki ar seiñ leh kyrchaan ki yei klam u President ka Synjuk Waheh Chnong, kiwa da dawa wow pynsangeh chwa chipor ya ka khayi neibhah ym yahaap wa ki paidbah u chah kset katwa ka yaw khayi lai bait ko iwa man kamwa leh chiliang.
Kamtæ da ong wa lada ym ye wow khang ya kani ka khayi pateiñ, neiliang ki paidbah wa im nei mylla sngi da toh u pynlait katkam ki kyndon yow yoh ki wow lai kamai jakpoh neibhah kani ka khlam toh kawa ngat ya kiwa mahajon wa kiwa dooh, neitæ i daw neliang ki ar seiñ da ong ki wa lada khang, toh u khang salonsar ym toh wow leh chiliang.
Neiliang ka KSU da yoh ko wow yaklam wa u SDO (Civil) Amlarem ynne ka sngi hajrong ini i noh chiliang kani ka hukum, tangwa uni u sahep da ong u wa ini ym chong ha oo wei chong ko ha ki bor wa haneiñ.
Da e yumut wow pynkrehkaam da ka Micro-Containment Area lada jia wa hiar smat kiwa yoh ya uni u khñiang khnang wa ki paidbah u yoh biang ki wow lai kreh lai kamai kajih neibynta wow pyndap ya ka yung ka sem.
