Shillong: Ki paidbah ka jylla da pynsñiaw ki yei sñiawdiaw hadien wa ki kattu katni ki dkhot seiñbhalang da ya kynaad ki ynne ka sngi, katwa ki dang ya yang lang ki ya ka rai yong ka yung dorbar wow dawa ya ka Inner Line Permit (ILP) iwa da rai lang da ki 60 ngut ki MLA ka jylla.
Ynne ka sngi da em leh i pynyoo bor hapyrdi ki seiñbhalang ha khmat ka pchem u Soso Tham Auditorium, Shillong du neidaw wa pynheh tem sur wei wa neidaw wa ki bor pynlai District da phah chong lut ya waroh ki paidbah ha katai ka thaw. Ini i huri hura da mih hapyrdi ki seiñbhalang yong kawi ka liang wa emlang ka KSU, FKJGP, HNYF wa RBYF wa ki seiñ kiwa em ha ka CoMSO.
Ha kani ka pynyoo bor da em leh 6 ngut kiwa da mynsoo, kiwa tip pyrtuid u Donboklang Kharlyngdoh, u Bashan L Mawnai, u Shanbor Marwein, u Manbor Khyriem, Banisha Nongsiej wa ka Betcy Snaitang.
Neiliang ki paidbah kiwa emlang ha katai ka thaw da pynsñiaw ki yei sñiaw sarom wow yoo ya kam ini i jia, tangwa ym bien ki u klam hakhmat Camera, kiwa da booh yei kylli leh cheiwon katæ ka lama dawa ya ka ILP ha i pyrtuid yong ka Meghalaya.
Neiliang yong ki kattu katni ngut ki manbei da ong ki wa ini i leh yong kiwa yahkhmat seiñbhalang da pynsarom sakhiat ko yaka jaitbru.
Hawa yoo ya ini i jia neiliang ki Magistrate da kyrriah noh ya ki dkhot ka CoMSO cha chiliang sarok kawa em Moobynna ha IGP khnang wym mih iwon iwon i kulmar.
U Donboklang Kharlyngdoh uwa man leh u Vice President ka HYC, da pynjem noh u yaka kynhun wa emlang deiwa kohngooh ya i phah ki bor pynlai District yow pyllait na kiwon kiwon ki kulmar. U Kharlyndoh da ong u leh wa ha itai i por wa ka CoMSO ym em yakhih wow dawa ILP da yachruit para Khasi.
Hawa pyrchang wow yaklam wa kiwi ki dkhot yong ki soo seiñ, ym em wa bien u klam hajrong ini i jia.
Discussion about this post