Jowai: Ki Scientist wa ki sahep ka Central Silk Board da wan hiar ki cha West Jaiñtia Hills ha ka 23 wa 24 tarik uni u bnai yow booddien hadooh katwon da lai chakhmat ka scheme ri khniang ryndia hapoh ka Mulberry Sericulture Development Programme hapoh ka District.
Kam wow pynkynmoo wa ka Ministry of Textiles, Govt. of India hapoh ka North Eastern Region Textile Promotion Scheme (NERTPS) da mynjur ki wow pynkrehkaam ya ka Intensive Bivoltine Sericulture Development Project (IBSDP) yow pynku yei ri khniang ryndia hapoh ri-loom Jaiñtia kawa daw pynlut ka sorkar India T. 24.48 Klur.
Kani ka Scheme toh kawa pynkrehkaam nadooh u snem 2015-16 heiwa kiwa yoh myntoi da em ki 1000 ngut wei da pynemkaam hadooh 500 Acre i thaw wow thung ya ki dieñ wa baam ki khniang ryndia. Katkam ki kyndon ka sorkar India kiwa yoh myntoi na kani ka scheme toh u man ki du ki kynthai donhi.
Ki heh ka Central Silk Board da yachem ki wa 5 kynhun kiwa yoh myntoi wei da boodien ki ya iwa da ye ki u leh ha kini ki snem wa da lai wei sñiawhun ki ya iwa da yoo ki wei kiwa ri khniang de ye ki u pynku ar chah ya i yoh nong ki.
Ki dkhot ka Central Silk Board da e buit ki ya ki warep yow pynku ya ka nong yong ki, ye ki u pynemkaam sa chiteiñ Acre i thaw yow thung dieñ baam khniang (Mulberry) kamjooh yow rep wa kiwi ki jhoor
Ha kini ki ar sngi ka Director of Sericulture, Meghalaya da e ko i yarap ya ki dkhot ka Silk Board wei da emlang leh ka Anika Passah, DSO, West Jaiñtia Hills.
Discussion about this post