Ha i wan yong u Montri ki kaam pohyung ka ri, u Amit Shah cha Shillong ynne ka sngi, neiliang ki Montri ka MDA da yoh ki wow rah ya ki phang wa kongsan yong ka jylla, wei da pynsñiaw ki leh yei sñiawhun yei yachem ha kani ka kynti wa u montri neibhah da chah chkoor yei pynsñiaw yong kiwa mihkhmat kiwa em ha ka sorkar.
Neiliang u Montri ka sorkar jylla u Hamletson Dohling da khana u wa da yaklam ya ki kattu katni ki phang ynne ka sngi wei da yaklam bha yei dawa ILP iwa da dawa nadooh nachwa, deiwa pynsñiaw leh wa jooh man u kam uwa yahkhmat warim ka KSU kawa da dawa ya ka ILP da slem bha, wei neiliang u Amit Shah da ong u wa daw pait wei daw pyntip, wei da yaroh u leh ya kani ka sorkar wa da ap ko yeini hadooh ka Home Ministry.
U Banteidor Lyngdoh uwa man leh kam u montri sorkar da ong u wa ha kani ka yachem, neiliang u Amit Shah da ap wei da e laad u wow yaklam uwi pa uwi wei kani ka yaklam daw mihsoh ko, wei da pynsñiaw u leh wa kam uwa mihkhmat daw booddien u, wei da pyntip u leh wa da yoh wow yaklam hajrong i emkaam ha i rep i riang ha ka jylla.
Sa uwi u montri ka jylla, u Renikton Lyngdoh da khana u wa da yaklam hawa yatoh wa ka Sixth Schedule heiyatoh wa ka Para 12 (A)(B) wei yei emkaam jhan wow pynkylla noh ya ka aiñ MMDR Act, iwa ye wow yarap deiwa pynkylla ya ka Sixth Schedule iwa emkaam yei im ka jylla. Da ong u leh wa ini toh i hok wei da pynsñiaw u wa ini toh i kyrmen wow yoh yei pynkylla namo ka Amendment, wei daw yaklam leh ka HSPDP wa ka sorkar jylla wow wanrah noh da ka Resolution ha Assembly.
Hawa pyrchang wow yaklam wa u Montri Rangbah ka jylla, u Conrad K Sangma ym em bien u wow ong iyi iyi leh hajrong i yachem ki Montri ka sorkar MDA næ ki seiñbhalang wa u Amit Shah.
