Ka All Jaintia Commercial Vehicle Association (AJCVA) dap ko dei mynsien wa sñiawkhia hawa yoo ko wa dang boon ki kari wa kheiñstiñ, kiwa lai kylleiñ kylleiñ hawa ym toh ki Number wa ka sngi wow lai ki.
Kamtæ ka seiñ da ong ko wa ini pynyoo wym em burom ki ya ki hukum wa da pynmih ka sorkar khamtam ha kam kini ki por wa dang joor ka khlam COVID-19. Hei yong sakhiat da toh wow lai katkam ka hukum ka sorkar.
U Paila Kordor Lyngkot u President ka seiñ da booh u yei kylli ya ki bor wa toh wow pait wa kammon ki kari yoh ki u lai katwa ngait hawa ka sorkar dep booh ko da ki Number wa ki sngi wa toh wow lai ki? Cheiwon ki bor wa toh wow pait, cheiwon em ki ha kam kini ki por? Namo kani ka hukum toh du ya ki khian ki dai don hi? Hei sakhiat ka aiñ emkaam wow man ko ka jooh ya waroh.
Da ong chooh chooh u lada i kam kiwa chong chnong ym burom i ya ka hukum yong ka sorkar wei lada jia wa kani ka khlam COVID- 9 joor ko wei lada ka sorkar hukum ko da ka Lockdown yei yi wow pynbaad i? U pynbaad ya ka sorkar namo ya idæ? Yi wow ya takhooh moosiang chwa lym toh ki kup chiliang ki sem chiliang kiwa im na kti ha ktien. Neitæ i daw lym sumaar bha i ya idæ, boi daw man pathan ko i tim ya i wa ya kiwi tawan.
Kamtæ kam kiwa chong chnong kiwa em yei kitkhlieh ya ka yung ka sem ka imlang sahlang to u ya kreh lang i chirup chirup yow ye u pynduna ya i poor u COVID- 19.
Ka seiñ da kyntu wei da kyrpaad joor ko khamtam ya ki kari waroh wow sñiawbha ki u lai katkam ki Number wa ki sngi wa da booh da ka sorkar wow lai ki khnang yow ye u yaleh thma ya uni u COVID- 19 uwa man uwa choon yong i waroh.
