Jowai : Ka seiñ HYC, West Jaiñtia Circle na ki por cha ki por jooh pynsñiaw ko wei kamjooh da dep yachem ko wa ki bor wa pait ya u sarok Jowai Intermediary Bye-pass uwa na Laadnartiang haddoh yingkieñ Myntdu neidaw wa sih u chawa palat pood. Ka seiñ da ong ko wa ym em wa ap yei ood ki khamtam ka PWD.
Ka seiñ da jied ko wow boodien yei sih uni u sarok hadien wa yoh ko boon ki ujor na ki paidbah khamtam kiwa em yung ha ki bynta uni u sarok neibhah i laphooh wa mih heipor wa lai ki truck toh man i chawa palat pood.
I maa, da yang i ya ki paidbah neibhah i por layur da jan poi wei ki skur leh ym slem de da sdang ki wei ki thaw lai kjat toh kiwa jrong kat u sarok kamtæ ki truck da pynemkaam lang ki ya ki luti lai kjat hawa lai ki.
Manda poi u slap, kani ka sarok u kylla ktieh ko iwa booh i eh kamjooh ya i maa ya kiwa lai kjat kiwa ye u tlær wei wow chah yooh ha ki truck.
Kamtæ neiliang ka seiñ sa chisien kyrpaad joor ko ya ka tnat PWD wow sñiawbha ko u pyrkhat yei eh i khoo ki paidbah yow lait nei jia wa sñiawsih.
Kani toh katkam ka khubor na u president ka seiñ u Damanleki Lathong.
Discussion about this post