Jowai: Ka seiñ Jaiñtia Students’ Union, hadien wa yoh ko ki ujor na kiwa boon ki bru heiyatoh wa i rukom krehkaam ki wakreh ka Jowai Civil Hospital, Ialong da chimkhia ko yeini i kaam deiwa booddien yow chem yeiwa sakhiat.
U Trainbormi War, uwa man u Disciplinary Secretary ka seiñ da ong u wa katkam ka ujor, ki paidbah da ood ki yei rukom krehkaam ki wakreh ha ka yung krehkaam (Office) wa e ya ki kot ki sla cha ki paidbah khamtam ki Birth wa ki Death Certificate.
Da ong u wa katkam wa man, em ki bru kiwa wan na jngai ki chnong wei ya i jooh i kaam haap wan ki ar le sien cha kani thaw heithaw wa i kaam toh u pyndep du chisngi donhi.
“Ki paidbah boonsien wan ki heipor wa biang (10:00 i step) tangwa ki wakreh won poi ki palat bait ya ka 11:00 waje, wei iwa phylla toh wa i por krehkaam ki toh du hapoh 2:00 i sngi,” da ong u War deiwa pynrap wa lada kamni ki wakreh sorkar kammon u ye ki u chakri hok ya ki paidbah khlem pynchitom ya ki.
Neiliang ka seiñ da dawa ko wa ki wakreh ha kani ka thaw sumaar toh u sangeh ki wow pynchitom ya ki paidbah wei toh leh wow thooh laad kammon wow pynyinsur yei kynta krehkaam yong ki khnang wow suk ki paidbah ya kiwa toh u chakri ki.
Heijooh i por ka seiñ da ong ko wa lada ini i chah pynchitom ki paidbah pteiñ i, neiliang ka seiñ daw lai ko chaphrang wot wow ujor cha u montri ka chnat i chait i khiah wa cha u montri rangbah ka jylla.
Discussion about this post