Sñiawkhia ka KHNAM-SYW yei wan khayi ki baar jylla khlem biang ki License wei wa tlot ka KHADC wow pynkrehkaam ya ki aiñ yong ka

Shillong: Ka Khun Hynñiewtrep National Awakening Movement, State Youth Wing (KHNAM-SYW) da pysñiaw ko yei sñiawkhia neidaw wa yoh u khayi laitlan ki baar jylla hapoh u pood u ang ka Khasi Hills Autonomous District Council, wei ynne ka sngi ki dkhot ka KHNAM-SYW da lai ki wow kyntu ya u CEM ka KHADC, u H S Shylla wow paitsiar wei ymhoi u e laad ya ki baar jylla wow khayi ki pyrchah ya ka aiñ.

U President ka tnat khynroo ka KHNAM, u Thomas Passah da ong u wa ka seiñ da chem ko ya ki baar jylla kiwa khayi khlem biang ki kot ki sla khamtam ha Iewduh, wei da e por ar tayaw ya ka KHADC wow leh yeiwa emkaam heiyatoh wa ini.

“Lada ka KHADC ym leh ko iyi iyi hapoh ar tayaw, toh wow e bor ko ya ka seiñ wow lai sylli hi yow ye ki u leh yeiwa emkaam,” da ong u Thomas.

“Ha i lai sylli ka seiñ ha Iewduh da chem ko wa ki baar jylla kiwa em kawi ka Trading License da pynlai ki ar tylli ki dukan, katwa kiwa boon na ki baar jylla won ym em License ki wow khayi tangwa da e daw ki wa dang phah pynthymme ki cha ka KHADC,” da ong u Thomas.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

“Hei yong sakhiat ki baar jylla toh u lai hi ki cha ka KHADC wow yoh ya ki License khayi, tangwa nga sñiaw phylla O wow tip wa kiwa kreh ka KHADC da lai ki wow thap pyrtuid ya ki baar jylla wow yoh ki baar jylla wow khayi ha Iewduh,” da pynrap u Thomas.

Neiliang ka seiñ da sñiaw ko wa ka aiñ Trading by Non Tribal Regulation, 1954 man ko kawa tkoh wei da kut ko du ha ka kot wei lada pynkrehkaam ya ka kamwa 80% daw dooh i khayi pyrchah aiñ kamjooh leh ka kaam Benami.

Ha iwi i liang u Passah da ong u wa ka seiñ da chem ko leh wa joor i wan kreh katwa ngait ki baar jylla kawa da wanrah yei maa kam ha ka thaaiñ Mawdiangdiang heiwa da ki hajar ngut ki baar jylla ki wym em ya ka License wei yeini leh da ngait kiwa pynlai kaam ha katai ka thaw.

Ka seiñ da ong ko leh wa na ki por cha ki por da chem ya kam kini ki kaam neidaw wym booddien ka KHADC wei ym chimkhia ko yeini.

Neiliang u CEM ka KHADC won da ong u wa ya kani ka kaam daw pynbait wa u EM ka tnat Trade ka Council, deiwa pynrap wa ymtoh u em uwi wot leh u baar jylla wow yoh u khayi khlem yoh ya ka License na ka Council.

Da ong u leh wa ki Contractor hawa wanrah ya ki baar jylla wow kreh mylla sngi haap yoh ki ya ka Labour License na ka KHADC wei lada chem ya kiwon kiwon kiwa leh pyrchah ya ini daw pynchitom ya ki.