Ka Khasi Students’ Union NKHD Unit Ri Bhoi District ha ka 14 tark uni u bnai da lai yachem ko ya u Deputy Commissioner, Arpit Upadhyaya wa ya u Superintendent of Police Ri Bhoi District, u Giri Prasad hajrong i chah kem ki le ngut ki Khasi na ka chnong Sabuda ha ka 10 tarik uni u bnai.
Neiliang u Burom Surong da ong u wa man iwa khyrngiat wa chah kem syndet ki 3 ngut kiwa chong chnong ka Sabuda ha ki pulit Assam hajrong i pynbaad wa kini ki le ngut da lai thang ki ya ka yingkieñ wa em ha Umler. Da ong u wa kini ki le ngut toh kiwa im du nei rep wei ha katu ka sngi chwa wow chah kem ki da lai yarap ki wow pynlait ya ka kari wa sahkut nei sih sarok.
Chooh chooh da ong u wa i kem ki pulit Assam toh iwa khlem yurim wei oo leh da man uwa smat wow wan chaphrang wow man kam u sakhi lada emkaam.
U Ferdynald Kharkamni, President KSU NKHD Unit da ong u wa hadien wa ka seiñ da yoh yutip ko hajrong ini i jia ya ki le ngut, da lai yachem ki ya u DC wa u SP ka Ri Bhoi, deiwa pynsñiaw yei sñiawkhia wa ki pulit Meghalaya ymye ki wow kem ya ki Nepali hajrong i chah jrongkti u DSP wa ar ngut ki pulit langrut ha ki bnai wa dadep.
Da ong u leh wa ka ki pulit ka Meghalaya leh toh u takit ki chirup wow chem yeiwa sakhiat ym du wow ngait ya ka bui wa phah da ka sorkar Assam neibhah lada chah kem ki Khasi kiwa lui-lui ha ki pulit Assam daw booh ko hei maa ya ki paidbah wa sah ha thaaiñ khappood wei da toh wow booh da ka Joint Investigation yow takit lang yow chem yeiwa sakhiat.
Ha ini i yachem ya ki khlieh ka District da emlang leh u President ka Synjuk Rangbah Shnong Raid Nongtung, u Blickstar Sohtun heiwa ini i thaw wa jai toh iwa dang haap hapoh ka Raid Nongtung.
