Shillong: Ka General Executive Council yong ka Khasi Students’ Union (KSU) wa pynman ynne ka sngi, da rai ko wow pyrchah bait wei ym pdiang da kammon kammon leh yaka Citizenship (Amendment) Act, 2019, wei kamwa da dep leh wow yaleh mukotduma da ka North East Students’ Organisation (NESO) yeiwa ka seiñ dang yang ko leh yei mih yong ka bichaar ha ka 22 tarik uni u bnai.
Hawa klam wa ki laad pathai khubor hadien wa la wai ka GEC, u President ka KSU, u Lambokstarwell Marngar da ong u wa ka seiñ u pteiñ bait ko wow pyrchah ya ka CAA, dei wow lai chakhmat wow lai pyn sñiawthooh paidbah wow yawer wei wow kyntu leh ya ki dorbar chnong wa kiwa synchaar tre ri hajrong kani ka bynta.
Hajrong ka Inner Line Permit (ILP), uwa yahkhmat ka KSU da pynsñiaw u yei sñiawsih neidaw wa suki kiaw yong ka sorkar jylla khlem da lai tied chooh yaka dwar yong ka sorkar India hadien wa dep wow chim lang ya ka rai dawa ILP ha ka yung dorbar MLA kattu da jan ar tayaw.
Da ong u leh wa kamwa da dep rai ha ka yung dorbar yong ka jylla da waroh 60 ngut kiwa mihkhamt, kamtæ toh wow chimkhia da waroh 60 ngut ki MLA wow sñiawthooh ya ini i dawa kamjooh wow pynkrehkaam noh ya ka Meghalaya Residents Safety and Security Act, 2016.
Ha iwi tawon i liang, ka General Executive Council yong ka KSU da rai wow pynthymme noh ya kiwa kitkaam hadien wa da kut ka samoi krehkaam wa le snem kawa man katkam ka riti krehkaam yong ka seiñ.
U President ka KSU da pyntip u wa ka GEC da rai ko wa i jied ya kiwa kitkaam wa thymme deiwa pynman ya ka General Election ha ka 22 tarik, Thohlakhmi (Feb) uni u snem.
Discussion about this post