Ynne ka sngi haka lai pait sylli lang namo ka Joint Site Inspection wada khut da u Deputy Commissioner ka West Jaiñtia Hills heiyatoh wa i chna ya u sarok thymme Jowai Bypass na Khlieh Riatturiem cha Mynkrem hadooh wa poi cha yingkieñ Treiongriang, wah Myntdu wa pynkreh daka M/S Kampung Kamyer Trading Company kawa na Arunachal Pradesh.
Neiliang ka Khooid Yaka Wah Myntdu (KYWM) da ong ko wa kani ka sarok daw e myntoi bha ko ya kipaidbah, tangwa ym toh won u bynda yaka wah Myntdu, ka Mynkrem khnang yow imlang ki bru chirup waka Myntdu.
Yeini da ong ko toh wada yoo chwa ki yei rukom kreh ka M/s Dhar Construction Company deiwa noh taroi yei khyndaw cha ka wah Myntdu wei lada jia ini i jooh ha uni u sarok Jowai Bypass wa thymme nadooh na Riatturiem daw ktah ko yaki pynthor, ki dam um, kamjooh i chah ktah ka um wa poi kut thlu yung ha Jowai lyngba ka PHE.
Ha kani ka Joint Inspection najrong ka seiñ Khooid Yaka Wah Myntdu, da emlang ka chnat PWD Road Jowai Central Division wa u P.K. Boro, Additional Deputy Commissioner ka West Jaiñtia Hills.
Neiliang u P.K. Boro ADC da hukum u yaka chnat PWD Jowai Central Division wow e ya ka Detail Project Report heiyatoh wa i jngai u sarok narood ka Myntdu waka Mynkrem, kamjooh kammon u yada yaki pynthor kba, wa ki liar wa mih um kiwa daw kai ka khyndaw cha ka Myntdu.
Neiliang ka Khooid Yaka Wah Myntdu da kyrpaad ko ya waroh kiwa chong chnong wow yieñ ryntih iwi donhi u yaleh yow im ka manbru longbru chirup ka Myntdu kam kiwa dang chkeh um, ka la’er, u skem i khyndaw, ka yurim yung wei u neh ki pynthor Myntdu cha neiñ cha wah yow yoh kba yoh khoo ha ki snem wa daw wan.
Kani toh katkam ka khubor wa phah da u K.L. Pariat, President Khooid Yaka Wah Myntdu.
