Ynne ka sngi ka seiñ kiwa chongdai ya kawa da tip kam ka Ri-loom Jaiñtia Traders Association (RJTA) da dap ko dei sñiawsih wa i sñiawkhia wa ym bien u DC ka West Jaiñtia Hills u yachem wa ki dkhot ka seiñ heipor wa thmu ki wow lai yachem ya oo.
Neiliang u Kyrmen Siangshai uwa man u Vice President ka seiñ da ong u wa dap ki dei sñiawsih wa khroo tam heiwa u DC ym chah u tang wow psiah hapoh kamra yong oo, deiwa ong wa kiwa chongdai kattu la kamwa chisnem da khang ya ki wow chong dukan ki wei ini da pynchitom i ya ki paidbah khamtam hei wow su ya ka bai wai yong ki.
Da ong u leh wa ka sorkar wa u DC da toh u pyrkhat ki ya ki paidbah deiwa beiñ yeiwa chah knieh ki mar kiwa chongdai deiwa ong, “Wa thngan i tæ mih i cha yaaw” deiwa pynrap leh wa ki bor pulit ymtoh wow leh embor thombor ki ya kiwa chongdai.
Ka Zoramsiang Theite kawa man ka Secretary ka seiñ, da beiñ ko ya i leh u DC neibhah na kini ki por wa dadep da kular u yei yakrehlang chirup wa ka seiñ tangwa manda poi ynne ymchah de u wow psiah ki. Da pynrap ko deiwa ong wa ka sorkar ymtoh u yoobeiñ ko ya kiwa chong yaaw neibhah kiwa kreh sorkar yoh ki ya ka tulop wei ka sorkar toh u krehlang ko chirup neibhah kiwa chongdai emkaam ki wow psa ya ka yung ka sem yong ki.
Ka Nidaialam Dkhar kawa chongdai wei kawa man leh kam ka Chairperson ka JSM Women’s Wing da ong ko wa da boon kiwa phone cha ki kiwa paan yarap na ki khamtam heiyatoh wow wai ka yaaw wei ynne dap ko dei sñiawsih neibhah wa wot ya ka seiñ yong ka leh ymbien u DC wow yachem wei i daw wa lai ko da ki ar luti toh wa man ko ka manbei wei sñiawkhia ko yeitæ. Da ban ko leh wa boon katni da em kamwa 45 ngut kiwa da paan yarap neibhah wa da chah beh yung ki neibhah wym ye ki u su ya ka bai yung hadien wa da em i khang ya ki yaaw wa i khang ya ki dong wei ym ye de ki wow khih mylla.
Kam u President ka seiñ, u Paila Lyngkot da ong u wa ynne ka seiñ da thmu ko wow lai yachem wa u DC heiyatoh wa kammon u leh wow wai biang ya ki dukan dukdoh tangwa phylla wow tip wa manda poi ha yung krehkaam u DC, neiliang u DC ym bien u wow yachem ya ki wei ini waroh da pynsñiawsih i ya ki.
Heiyatoh wa i jia ynne i step heiwa da chah knieh ki mar wa dai ki bru ha yaaw, u Paila da kylli u wa neiyi i daw kam ki tre chnong ym em hok ki mo wow lai chongdai ya ki mar yong ki, da pynrap u deiwa ong wa lada kiwi ki dukan da chah ya ki wow wai ki neiyi i daw won wa lai knieh ya ki mar ki jhoor ki soh wa dai ki, da kyntu u leh ya ki bor ka aiñ wow yaklam chwa wa ki bru dei ktien chwa wow leh iwon iwon dei bor.
