Ka Synjuk Ki Waheh Chnong Jowai ha ka yalang kawa jhan wa da pynman ha ka 14 tarik uni bnai da yaklam yillu ko hajrong i pynkrehkaam ya ka kyndon Section 144 CrPC wa i pynkrehkaam ya ka Total Curfew ha waroh kawi ka District neidaw wa wan ka la’ær wa ar yong ka khlam COVID-19.
Neiliang ka Synjuk, ynnin ka 15 tarik da thoh ko cha u DC ka West Jaiñtia Hills deiwa pynsñiaw ki yei phylla wa kammon kiwa chongdai jhoor na kylleiñ ka District da wan ki cha kylleiñ ka Jowai wow dai ya ki jhoor yong ki khamtam ha ki yaw aw jan man-ka-sngi wei ki kari wa lai wa wan khlem yohbor leh dang boon ki hapyrdi wa em i khangsbak.
Chooh chooh da ong ko wa ki kari wa lai wa wan ymdu wa lai ki katwa ngait tangwa da kit ki leh ya ki bru palat pood kam ha kini ki por wa da khang pyrchah yeitæ.
Da ong ko wa ki kari kamai boonsien da sangeh ki ha Riatsasim, Yingkieñ Myntdu wa ha Mihmyntdu wow kit bru khlem em kiwa khang ya ki wei kini waroh pynyoo ki wa em i tlot ha i rukom sonteri/thaw sylli (Entry/Exit Point) wei ki kari da psiah ki cha Iawmusiang wa Stand War iwa pynyoo wa tlot ki bor wow pynkrehkaam ya ki hukum ka sorkar.
Ka Synjuk da ong ko leh wa ini waroh ye i wow wanrah yei boon ki bru kiwa chah ktah ha ka khlam wei kawi na ki laad wow khang yei poor kani ka khlam toh deiwa pynkrehkaam hok ya ki kyndon wei wow khang yei lai i wan ki bru khamtam na ki thaw wa em boon ngut kiwa chah ktah.
Heijooh i por da ong wa ki Waheh Chnong chem chitom bha ki wow phah mih ya ki bru kiwa wan dai mar khlem yohbor neibhah lada ymye u kdoh yei lai i wan ki bru, neiliang ki Dorbar Chnong da maham ki wa ini waroh daw pyntlot i ya ki wow kreh ya ki kaamram yong ki.
