Ka Voice of the People Party na Pynursla Circle da pynsñiaw ko yei sñiawkhia hajrong i pynbna Curfew ka sorkar Meghalaya ha ki thaaiñ khappood wa ka ri Bangladesh.
Kam wow kdaw heini wa yeini i pynbna wa da mih ynnin ka sngi na u Symbood Montri Rangbah yong ka jylla Meghalaya, u Prestone Tynsong hadien wa ka yakhih paidbah ha Bangladesh da nang joor wot hadien wa ka Prime Minister yong ka ri da hiar chuki ko wei da yut ko napoh ka ri.
Ha ka kyrwoh na u Joint Secretary ka VPP, u Shemborlang Rynjah da ong u wa ka VPP ym pyrchah ko ya ka Curfew tangwa da kyntu ya ki paidbah yong ka thaaiñ wow man kiwa syndong wei kiwa husiar bha ha kam kini ki por khamtam ha ki kynta wa krehkaam ka Curfew.
Da ong wa lada i pynkrehkaam ya ka Curfew toh dei wym biang ki chipai wa yada ha tymbud u pood wei lada ki paidbah leh yoh thiah ki yung ki sem ki, ye wow man pathan i e laad ya ki nong Bangladesh wow yoh u psiah suk chapoh Meghalaya.
Kamwa man kattæ ym em iwon iwon i chah ktah i suk i saaiñ ha ki thaaiñ khappood neiwa jia ha Bangladesh wei da sñiawthoh wa katai ka Curfew toh man ko du ka laad yada. Kamtæ ka VPP da kyntu ko ya ka sorkar wow pyntikna yei chongsuk chongchngaaiñ yong ki paidbah ha ki thaaiñ khappood wei wow pynkhlan leh ya ki bor yada ha kam kini ki por.
Ka seiñ da kyntu ko leh ya ki paidbah wow man kiwa sian wei kiwa paitbniah bha.
Discussion about this post