Sñiawkhia ka WJSU yei joor stang u sarok wa chna na Amlarem hadooh Pdengshakap

Ka seiñ War Jaiñtia Students’ Union (WJSU) Central Body deiwa emlang u Rimingson Daw, Asst. Executive Engineer ka Amlarem Border Roads Sub-Division da lai pait lai sylli ki ya u sarok wa dang chna kattæ nadooh Amlarem hadooh Pdengshakap kam chibynta u sarok Amlarem-Muktapur.

I daw wa da pynman ya ka seiñ wow lai pait ya uni u sarok deilang wa u Engineer toh neidaw wa ood ki paidbah wa u Contractor da kreh khalær u ya uni u sarok.

Da chem wa uni u sarok wa da chna toh uwa stang bha tangwa katkam wa batai u Engineer ya uni u sarok da booh ka mang poisa wow siang rong chi sla donhi.

Neiliang kiwa yahkhmat ka seiñ da kyntu ki ya u Engineer wow sñiawthooh u wow pait bniah deiwa chna ya uni u sarok katkam wa da mang poisa wei ka seiñ leh daw booddien ko yeini wa yei rukom chna ya u sarok.