U MLA ka Umroi, u George Lyngdoh ynne ka sngi hapoh ka Dorbar Synrai da wanrah u ya ka phang hajrong i wym em kem ya u Vicky Dey wot hadien jan dap chi snem wa da dep ujor FIR pyrchah ya uni u bru wa da klam chiboon ki kyntien pyrchah ya ki jaitbru ka jylla uwa pynpoor leh ya ki khubor thok lyngba ki Social Media heiwa da klam beiñ u leh ya kiwa mihkhmat ka jylla.
U George da ong u wa uni u bru da booh u hei maa ya ki bru ka jylla kiwa sah cha kiwi ki jylla deiwa pteiñ wow pynbood naam yei pyrtuid ka jylla wei da pynsih u leh yei dur ka jylla deiwa pyrchang leh wow wanrah yei sñiaw yaphær jaitbru.
Chooh chooh u George da ong u wa ini da pynyoo wa ki pulit yong i ym ye ki wow leh iyi iyi manda em ki bru kiwa na baar jylla kiwa leh ya kam kini ki kaam pyrchah aiñ kiwa da tip kam ki “Hate Crimes” deiwa ong wa ki paidbah da nujor ki yeini wym ye ki pulit wow leh iyi iyi heiwa cha kiwi ki jylla kam ka Nagaland wa Arunachal Pradesh smat ki wow leh yei kaam yong ki lada em kam kini ki jia hadooh wa da mih i klam wa ki pulit ka Meghalaya toh kiwa swe kiwa kop yei chlur yong ki du hapoh ka jylla donhi tangwa manda emkaam wow yada yei pyrtuid ka jylla, ki pulit yong i ym ye ki wow leh iyi iyi leh.
Da ong u leh wa ki bru da ong ki wa ki pulit ka jylla smat ki wow tynyap ya u bru heipor 3 waje i step uwa thiah kjut ha thaw thiah tangwa manda toh won wa u Vicky Dey ym em leh iyi iyi leh. Wei ki pulit hap ki wow pynkylla noh yei dur yong ki yow yoh ki yei chaniah ki paidbah.
Hawa e yei jubab, u Montri Rangbah ka jylla da ong u wa ki pulit da chimkhia ki ya ini i kaam hajrong ki Video wa da pynpoor u Vicky Dey kiwa ye wow wanrah yei sñiaw yaphær jaitbru ha Meghalaya heiwa ha kini ki Video u Vicky Dey da ong u wa em ki seiñ kiwa da pynbor ya ki jaitbru ‘Non-Tribal’ wow khang ya ki kaam khayi pateiñ yong ki kam ha Ichamati heiwa neiliang ki pulit ka Lumdiengjri da booh ki leh ya ka FIR kawa da phah won cha ka Shella PS ha ka 10-11-20 katkam ka hukum ka Additional District Court.
Da pyntip u leh wa neiliang ki pulit da phah ki ya ka Look Out Notice cha u SP ka North Goa, Panaji wa cha u SP ka South Goa, Margao neidaw wa uni u bru da suba toh uwa rieh cha kini ki thaw tangwa da pyntip ki wa ym em chem ya uni u bru wei da phah leh ya ka Look Out Notice cha u Commissioner of Police Lalbazar Police Headquarter Kolkata wei ym em yoh jubab hadooh katni, wei neiliang u Special SP CID, Meghalaya leh da phah u ya ka Look Out Notice cha waroh ki jylla ha India tangwa ym em yoh yei jubab hajrong ini.
U Conrad da ong u leh wa u George da wanrah u yei artatien wei i klam u da yoo lakam wym tip ki pulit wow leh yei kaam yong ki, hajrong ini u Conrad da ong u wa sñiawsih wa kiwi mihkhmat paidbah yoo beiñ ki ya ki pulit ka jylla dei wym pyrkhat yei bor wa i por wa da pynlut ki pulit wow yada ya i deiwa mylliñ leh ya iwa bha wa leh ki yow khanglaad ya ki kaam wa sih deiwa kular leh wa ki pulit u chimkhia ki ya ini i kaam hadooh wa poi i cha wakut.
U George hawa e yei jubab da ong wa i klam yong oo toh katkam i sur ki paidbah ym toh i sñiaw yong oo wei i sur ki paidbah toh iwa emkaam heiwa neiliang yong oo samen sñiawngooh u ya ki kaam wa da leh ki pulit tangwa i wym leh ki yei kaam yong ki khamtam hajrong ini i Video ye i wow wanrah yei sñiaw yaphær jaitbru wei ym kwah de wow jia biang iwa da dep jia hapoh ka jylla.
Da ban joor u leh wa iyi mut kini ki Look Out Notice wei heiwon da thooh ki la chi snem wei lada ym em yoh jubab toh i kaam ki pulit wow booddien para pulit.
