Ynne ka sngi u MDC ka Liang Pyrchah, u Jamshaphrang Pohtam da pynsñiaw u yei sñiawkhia hajrong i slem ka JHADC wow e ya ki Land Holding Certificate (LHC) wa ki Patta wei yeini da ong u heipor wa man ka Dorbar Mang Tangka ka JHADC.
U Jamshaphrang da kylli u katwon tylli ki LHC wa dang sahteiñ heiwa u EM, u Medling Swer da khana u wa ha Elaka Amwi em 32 tylli, ha Elaka Nongtalang won 12 tylli.
Hawa kylli won u ya ki Patta wa sahteiñ, u Lasky Rymbai kam u EM da khana u wa em 11 tylli wa pynkylla pyrtuid ha Elaka Nongtalang, Darrang, Jowai wa Amwi katwa kiwa pynthymme won wa sahkut em ki 2 tylli wa sah hadooh u February 2026 hapoh ka Land Records Department.
Da kylli u Jamshaphrang yei daw wa slem u e ya ki Patta, heiwa u Medling da khana u wa em boon ki daw nadooh ki wym em NOC, ym biang ki Dostabit, u pood soodong wa kiwi.
Chooh chooh u Jamshaphrang da pynrap u wa ym em ki daw tangwa manda booddien u da ong wa sahkut ki File, yeini u Medling da kyntait u deiwa ong wa katwa em ki kot da pyndep bait u yei kaamram u kam u Executive Member.
U Jamshaphrang da kylli biang u wa em boon kiwa kreh wa da chong-ngiah wei mynnu u thung salan ya ki, yeiwa u Medling da jubab u wa daw yaklam yeini wa u CEM kamjooh ka EC.
Da ong u leh wa neiyi i daw wa em ar le pyrtuid kawi ka Patta, yeiwa u Lasky da khana u wa ka Council hi e ko ya ki kot ki sla katkam i tyrwa (Recommendation) ki Dolloi wei yeini da yaklam leh hapoh ka Executive Committee dang ha ki sngi wa dadep.
Neiliang u Jamshaphrang da kyntu u ya ki EM wow klam ya ki Dolloi khnang wow lait u mih i kulmar hadien neibhah ini toh neibynta i bha i miat hi ki paidbah.
Discussion about this post