Jowai: Ka HYC Mawthadraishan Circle da pynsñiaw ko yei sñiawkmen kawa khroo wow yoo yei chah chkor ka chnat PWD yei ood ka seiñ wa ya i angnood ki paidbah wa kiwa chong chnong yong ka thaaiñ Mawthadraishan haki bynta yong ka thaaiñ Nongshillong hadooh ki thaaiñ Pariong, ya iwa ka chnat PWD yong ka sorkar jylla da pynbha yaka sarok na Nongshillong hadooh ki thaaiñ Pariong.
Ha ka kyrwoh na uwa yahkhmat ka HYC Mawthadraishan Circle u Marcos R Marthong da ong u, ‘I e khublei i ya u montri PWD wa yaka chnat PWD, kyrpang leh ya u MLA ka Mawthadraishan u H.B. Nongsiej uwa man leh katni u montri ha kani ka Sorkar MDA ya i chimkhia yong oo wow klam lang cha ka chnat PWD yow pynbha ya kani ka sarok kawa da sih bha, i chimkhia u H.B Nongsiej da man ko ka kyrkhu kawa khroo yaki paidbah kiwa da maad yei eh kattu da boon snem wa da dep.
Chooh chooh da ong wa u sarok na Nongshillong cha Pariong man ko leh kawa pyniasoh chadooh South West Khasi Hills wei kyrmen skem lyngba i pynbha na Nongshillong hadooh Pariong ka chnat PWD daw pynbha ko leh hadooh ki bynta yong ka South West Khasi Hills khnang wa ki paidbah na kitai ki thaaiñ u suk ki i lai i wan wei khamtam ha ka kit ka bah ka wow wanrah yaka yoh ka kot ha ki chnong ki thaw.
Ka kyrwoh na u Marcos R Marthong, President HYC Mawthadraishan Circle.
Discussion about this post